Mairie Horß
De Mairie Horß weer in de Franzosentied (1810 bet 1813) een von de veer Mairien, in de de Kanton Otterbarg indeelt weer. De Seet weer in Horß. Se harr 1511 Inwahners.[1]
Historie
ännernDe Ümgegend von Horß hett vör de Franzosentied to dat Amt Otterbarg un de Amtsvaagdie Söttmer von dat Amt Rodenborg in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Horß een von de 13 Mairien in’n Kanton Otterbarg von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Horß weer nu een von de veer Mairien in’n Kanton Otterbarg, Distrikt Bremen, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de fiev Mairien Horß, Reeßen, Otterst, Söttmer un Höperhöben (all fiev in’n Kanton Otterbarg) höört harrn. De Mairien Otterst un Höperhöben sünd blots deelwies an de Mairie Horß fullen. De annere Deel von de Mairie Otterst is an de Mairien Otterbarg un Hu’e kamen un von Höperhöben an de Mairie Rodenborg.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
ännernDor hebbt düsse Öörd tohöört:
- Kaiserriek Frankriek:[1]
- Horß (125 Inwahners), Northauen (108), Taaken (128), Stapel (69), Bittst (38), Clünner (20), Groot Söttmer (446), Lütt Söttmer (164), Fährhoff (25), Evernhusen (20), Dodenbarg (10), Clüversbossel (55), Reeßen (224), Stuckenbossel (65), Barkhoff (14)
Vondaag sünd düsse Öörd Deel von de Gemeen Otterbarg un de Samtgemeen Söttmer.
Footnoten
ännern- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 97
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 18