Departement von de Wersermünnen
Dat Departement von de Wersermünnen (franzöösch Bouches-du-Weser [buʃ.dy.ve.ˈzɛːʁ]) weer en Departement von dat franzöösche Kaiserriek (een von de dree Hanseaatschen Departements), dat in de Franzosentied von’n 1. Januar 1811 bet 1814 bestahn hett.
Laag
ännernDat Departement dee in’n Noorden an de Noordsee grenzen. In’n Noordoosten leeg dat Departement von de Elvmünnen un in’n Süüdoosten dat Königriek Westfalen. In’n Süüdwesten weer dat Departement von de Bövere Eems un in’n Noordwesten dat Departement Oost-Eems.
Historie
ännernNadem dat Kurförstendom Hannover sik gegenöver Frankriek slahn geven harr, is dat Deel von dat Königriek Westfalen worrn. De Noorden von dat Kurförstendom hett denn dat Departement von de Elv- un Wersermünnen billt, dat von’n 1. März 1810 bet to’n 31. Dezember 1810 bestahn hett. To’n 1. Januar 1811 müss dat Königriek Westfalen dat Departement aver al wedder afgeven un dat is denn tohoop mit de Fre’e Rieksstadt Bremen en direkten Deel von dat Kaiserriek Frankriek worrn. Dat Rebeed von dat Departement von de Elv- un Wersermünnen is twischen de Departements von de Elvmünnen un von de Wersermünnen opdeelt worrn. Ok en Deel von dat Hertogdom Ollnborg is dor mit bikamen.
De Grenz weer de ole Grenz von dat Amt Ritzbüttel na Land Wusten, denn de Grenz von Wusten na Hadeln bet Beers un von dor bi Bremervöör an de Oost. Denn an de Oost langs bet na de Au un von dor na en Arm von de Wümm hen un op Hillen to un na Slötelborg.
Nadem de Allieerten Napoléon I. 1814 ünnerkregen harrn, is dat Kurförstendom Hannover in Form von dat Königriek Hannover wedderkamen, dat Hertogdom Ollnborg as Groothertogdom Ollnborg un Bremen is wedder egenstännig worrn.
De Höövdstadt von dat Departement weer Bremen. Dat harr 329.862 Inwahners op en Rebeed von 17.994,625 km². In de List von de franzööschen Departements harr dat de Nummer 129, de ok bi de Poststempels bruukt worrn is.
| Distrikt | Inwahners | Kantons |
|---|---|---|
| Bremen | 104.299 | Achem, Bremen mit de dree Stadtkantons West-Kanton, Oost-Kanton un Kanton Neestadt un den Landkanton, Leendaal, Otterbarg, Rodenborg, Syke, Thänhusen, Veern |
| Ollnborg | 92.602 | Berne, Burhave, Demost, Elsfleth, Hatten, Ollnborg, Övelgönn, Raastäe, Varel un Westerstäe |
| Neenborg | 50.327 | Bassen, Brooksen, Hoya, Levenau, Rethen, Stolzenau, Sulingen un Wasra |
| Bremerleh | 82.634 | Beverst, Bremerleh, Dorum, Hagen, Oosterholt, Vesack |
Präfekten
ännernPräfekt von dat Departement weer bet to’n 17. Oktober 1813 Karl Philipp Alexander von Arberg. Arberg hett in dat Eelkingsche Huus an’n Doomshoff un later in’n Eschenhoff an de Doomsheid seten. Nadem von Arberg flücht is, is de vörherige Ünnerpräfekt Johann Pavenstedt Präfekt worrn un hett dit Amt bet to dat Enn 1814 behollen.