Falje

Wapen/Flagg	Koort
Basisdaten
Bundsland: Neddersassen Landkreis: Rodenborg Samtgemeen: Sürsen Gemeen: Sandbossel
Inwahners:
Postleettall:	27446
Geograafsche Laag:	53° 24′ N, 9° 12′ O

Falje (hoochdüütsch Falje) is en lütten Oort in de Gemeen Sandbossel (Samtgemeen Sürsen) in’n Landkreis Rodenborg, Neddersassen.

Geografie

De Oort Falje liggt bi’n Holt Falje. Von Süüd na Noord flütt de Durbeek an’n Oostrand von Falje langs un münnt dree Kilometer in’n Noorden in de Bever. De 1,2 Hektar grote Moorsee bi Falje is mit dat Holt ümto an’n 13. Juli 1937 ünner Landschopsschuul stellt worrn. Later is dat aver wedder ophoven worrn.

De Naveröörd sünd Bevern mit Bokel, Plönjeshusen un Bockhorst in’n Noorden, Deins, Löh un Visoh in’n Oosten, Rohr in’n Süüdoosten, Parnwinkel, Sürsen un Botterbarg in’n Süden, Hütten un Ochenhusen in’n Süüdwesten, Sandbossel in’n Westen un Minst in’n Noordwesten.

Historie

Nadem de Hoff Falje 1884 an’n Staat verköfft worrn is, sünd so bi 850 Morgen Land opforst worrn. De Hüüs von’n Hoff sünd deelwies op Afbrook verköfft worrn. Een von de Hüüslingshüüs, dat toeerst 1805 in Falje boot worrn is, steiht vondaag noch in Ohrel.

In de Franzosentied von 1810 bet 1814 hett de Oort to de Mairie Bevern in’n Kanton Zeven höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to dat Amt Zeven tohöört. Na 1885 weer dat in’n Kreis Zeven. 1932 is dat Deel von’n Landkreis Bremervöör worrn un 1977 von’n Landkreis Rodenborg.

De Oort is von öllers Deel von Ochenhusen ween. Ochenhusen is denn an’n 1. März 1974 Deel von de Gemeen Sandbossel worrn.

Inwahnertall

Johr	Inwahners
1824-00-001824	1 Füürsteed
1848-00-001848	16 Lüüd, 2 Hüüs

Religion

Falje is evangeelsch-luthersch präägt un höört to dat Kaspel von de Lamberti-Kark in Sürsen.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Weertschop un Infrastruktur

Verkehr

An Falje langs löppt de Bundsstraat 71, de in’n Noordwesten na Bevern un Bremervöör geiht un in’n Süüdoosten na Sürsen, Zeven un Rodenborg. In’n Oosten geiht de Kreisstraat 108 na Deinst un Malst.

De nächste Autobahn is de Autobahn 1. De Opfohrt 48 Elsdörp liggt so 23 Kilometer in’n Süüdoosten von Falje.

De nächste Bahnhoff is de Bahnhoff Bremervöör an de Bahnlien Buxthu-Bremerhoben so bi ölven Kilometer wied weg in’n Noordwesten. Fröher hett de Bahnhoff Deinst an de Bahnlien Bremervöör–Wasra direkt bi Falje legen. Disse Bahnhoff hett 1969 för den Personenverkehr dichtmaakt.

Literatur

• Michael Ehrhardt: Ober Ochtenhausen. Altenburg - Falje - Hütten - Stoppelheide. 2 Bänn, 2004/2005