Mairie Niewohl

De Mairie Niewohl weer in de Franzosentied (1810 bet 1813) een von de veer Mairien, in de de Kanton Dorum indeelt weer. De Seet weer in Niewohl. Se harr 1479 Inwahners.

Historie

De Ümgegend von Niewohl hett vör de Franzosentied to dat Amt Beers un dat Vaagdiegericht Land Wusten in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Niewohl een von de acht Mairien in’n Kanton Beers von’n Distrikt Bremervöör, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Niewohl weer nu een von de veer Mairien in’n Kanton Dorum, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to dree Mairien höört harrn: de Mairien Niewohl un Sievern ut’n Kanton Beers un de Mairie Millm ut’n Kanton Dorum. Von de Mairie Millm sünd aver blots de Öörd Kraansborg, Holsseln un Holsselnerfeld an de Mairie Niewohl kamen. De Rest keem an de Mairie Spiek.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Niewohl, Krümpel, Wanhöden, Ludenhütt, Neemöhlen

• Kaiserriek Frankriek:

  Niewohl (455 Inwahners), Krümpel (98), Wanhöden (50), Ludenhütt (2), Neemöhlen (10), Holsseln (314), Holsselnerfeld (5), Kraansborg (26), Sievern (519)

Vondaag sünd düsse Öörd Deel von de Gemenen Wuster Noordseeküst un Geestland.