Lindheim (Landkreis Veern)

Wapen/Flagg	Koort
Basisdaten
Bundsland: Neddersassen Landkreis: Veern Gemeen: Eiten
Inwahners:
Postleettall:	28876
Vörwahl:	04207
Geograafsche Laag:	53° 3′ N, 9° 3′ O

Lindheim (hoochdüütsch Lindheim) is en lütten Oort in de Gemeen Eiten in’n Landkreis Veern, Neddersassen. Binnen de Gemeen höört de Oort to de polietsche Oortschop Schaaphusen.

Geografie

De Oort liggt op de Achem-Veerner Geest. Dat Water ut dat Rebeed flütt över’n Bassener Möhlengraven na’n Süüdarm von de Wümm hen af.

De Naveröörd sünd Schaaphusen in’n Noorden, Bassen mit Bassenergrund un Bassenerkamp in’n Noordoosten, Heinsbarg un Lüttjen Hollen in’n Oosten, Üserdicken in’n Süüdoosten, Bössel un Laheit in’n Süden, Emßen mit Up’m Vie un Emßerthünen in’n Süüdwesten, Eiten in’n Westen un Eitermöhlen in’n Noordwesten.

Historie

Lindheim is 1827 grünnt worrn. In dat Johr hebbt ölven Köpers dat Rebeed bi’n Amtmann von dat Amt Achem op Arventins köfft un ünner sik opdeelt.

Verwaltungsgeschicht

De Oort hett vör 1852 to de Westvaagdie von dat Gogericht Achem tohöört, dat 1852 denn to dat Amt Achem worrn is. Na 1885 weer dat in’n Kreis Achem. 1932 is de Kreis Achem mit’n Kreis Veern tohoopgahn un hett den ne’en un grötteren Kreis Veern billt.

De Oort hett fröher to de Buurschop un later to de Gemeen Emßen höört. 1927 is de Oort von Emßen in de Gemeen Schaaphusen wesselt. Düsse Gemeen is 1963 Deel von de Gemeen Eiten worrn. Vondaag höört Lindheim binnen de Gemeen to de Oortschop Schaaphusen.

Inwahnertall

Johr	Inwahners
1848-00-001848	92 Lüüd, 12 Hüüs
1871-12-011. Dezember 1871	78 Lüüd, 16 Hüüs
1885-12-011. Dezember 1885	65 Lüüd, 13 Hüüs
1905-12-011. Dezember 1905	64 Lüüd, 12 Hüüs

Religion

Lindheim is evangeelsch-luthersch präägt un höört to dat Kaspel von de Petri-Kark in Eiten. Düsse Kark is 1861 boot worrn. Vörher hett de Oort to dat Kaspel von de Laurentius-Kark in Achem tohöört.

För de Kathoolschen is de St.-Matthias-Kark in Achem tostännig.

Weertschop un Infrastruktur

För Lindheim is de freewillige Füürwehr Eiten mit tostännig.

Verkehr

In’n Noorden an Lindheim langs löppt de Landsstraat 168, de in’n Westen över Eiten na de Bremer Oortsdelen Oosterholt un Hemeln geiht un in’n Noordoosten över Bassen na Otterbarg. Von de L 168 gaht na Süden twee Landsstraten af: in Eiten de L 167 na Achem un in Bassen de L 156 na Üsen.

De nächste Autobahn is de Autobahn 1 (Afsnidd Bremen–Hamborg), de direkt dör den Oort dörföhrt. De Opfohrt 52 Eiten liggt so dree Kilometer in’n Westen von Lindheim an de L 167.

De nächsten Bahnhööv sünd so bi söss Kilometer wied weg in’n Noordwesten de Bahnhoff Sao’ern an de Bahnlien Hamborg–Bremen un in’n Süüdwesten de Bahnhoff Achem an de Bahnlien Wunsdörp–Bremen.

Scholen

De Kinner ut Lindheim gaht na de Grundschool Schoolstraat in Eiten. Ok fröher sünd se al jümmer in Eiten na Volksschool gahn.