Mairie Spiek
De Mairie Spiek weer in de Franzosentied (1810 bet 1813) een von de veer Mairien, in de de Kanton Dorum indeelt weer. De Seet weer in Spiek. Se harr 2359 Inwahners.[1]
Historie ännern
De Ümgegend von Spiek hett vör de Franzosentied to dat Vaagdiegericht Land Wusten un dat Amt Noordholt in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Spiek een von de ölven Mairien in’n Kanton Dorum von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Spiek weer nu een von de veer Mairien in’n Kanton Dorum, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de veer Mairien Spiek, Cappel, Millm un Neefeld (all veer in’n Kanton Dorum) höört harrn. Von de Mairie Neefeld is aver blots en Deel an de Mairie Spiek kamen. De annere Deel keem an de Mairie Dorum. Ok de Mairie Millm is nich kumplett an de Mairie Spiek fullen. De Öörd Kraansborg, Holsseln un Holsselnerfeld kemen an de Mairie Niewohl.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd ännern
Dor hebbt düsse Öörd tohöört:
- Kaiserriek Frankriek:[1]
- Spiek (574 Inwahners), Cappel (594), Bösenbüttel (18), Grotenbüttel (10), Lüth (65), Millm (61), Noordermarren (33), Noorderspecken (68), Sorthum (40), Süderspecken (49), Südermarren (46), Scharnst (11), Cappeler Neefeld (250), Dieksenn (140), Noordholt (136), Spieker Neefeld (224), Northum (40)
Vondaag sünd düsse Öörd Deel von de Gemeen Wuster Noordseeküst.
Footnoten ännern
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 104
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 16