Sleßel

Wapen/Flagg	Koort
Basisdaten
Bundsland: Neddersassen Landkreis: Rodenborg Samtgemeen: Söttmer Gemeen: Reeßen
Flach:	5,77 km²
Inwahners:
Postleettall:	27367
Vörwahl:	04268
Geograafsche Laag:	53° 9′ N, 9° 16′ O

Sleßel (hoochdüütsch Schleeßel) is en Dörp in de Gemeen Reeßen (Samtgemeen Söttmer) in’n Landkreis Rodenborg, Neddersassen. Bi Sleßel höört ok de lüttje Oort Platenhoff bi. De Oort Bittst hett polietsch jümmer to Taaken höört, hett kulturell ans aver ok veel mit Sleßel gemeen.

Geografie

Dicht bi Sleßel löppt de Wiest langs.

De Naveröörd sünd Platenhoff in’n Noorden, Mulmshorn in’n Noordoosten, Höperhöben un Boitzen in’n Oosten, Waaschen in’n Süüdoosten, Hassendörp in’n Süden, Söttmer, Clüversbossel un Reeßen in’n Süüdwesten un Taaken, Bittst un Horß in’n Noordwesten.

Historie

In de Franzosentied von 1810 bet 1814 hett de Oort to de Mairie Rodenborg in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Amtsvaagdie Söttmer in dat Amt Rodenborg tohöört. Na 1885 weer dat in’n Kreis Rodenborg. 1977 is dat Deel von’n ne’en, grötteren Landkreis Rodenborg worrn.

De Oort is an’n 1. März 1974 Deel von de Gemeen Reeßen worrn.

Stratennaams hebbt de Öörd Sleßel, Bittst un Platenhoff eerst 2005 kregen. Vörher sünd de Hüüs dör’n ganzen Oort dörnummereert ween.

Inwahnertall

Johr	Inwahners
1812-00-001812	70
1824-00-001824	12 Füürsteden
1848-00-001848	90 Lüüd, 14 Hüüs
1871-12-011. Dezember 1871	81 Lüüd, 14 Hüüs
1910-12-011. Dezember 1910	109
1925-00-001925	125
1933-00-001933	119
1939-00-001939	106
2003-12-3131. Dezember 2003	160*

* 2003 ahn Bittst (65 Inwahners) un Platenhoff (24 Inwahners).

Religion

Sleßel is evangeelsch-luthersch präägt un höört to dat Kaspel von de Johannes-de-Döper-Kark in Horß. Düsse Kark is 1963 boot un 1989 as Karkengemeen egenstännig worrn. Vörher hett Sleßel to dat Kaspel von de Georg-Kark in Söttmer höört.

För de Kathoolschen is de Corpus-Christi-Kark in Rodenborg tostännig.

De Karkhoff in Sleßel is 1951 inricht worrn.

Kultur

En Denkmaal för de Fullenen ut de twee Weltkrieg’ steiht an’n Karkhoff. Dat is dor 1958 henstellt worrn, nadem dat vörher in de Dörpmidd stahn hett.

Verenen

Sleßel hett en egene freewillige Füürwehr, de na’n Tweten Weltkrieg grünnt worrn. De eerste Füürwehr is an’n 3. Februar 1902 as Plichtfüürwehr opstellt worrn.

Weertschop un Infrastruktur

De Oort is 1899 an dat Telefoonnett anslaten worrn. De elektrische Stroom is in de Tied 1919 bet 1921 kamen. Stratenlanternen sünd 1968 opstellt worrn un Eerdgas is in dat Johr 2000 kamen. Dat Afwater geiht na dat Klärwark in Söttmer.

Dat nächste Grundzentrum is Söttmer.

Verkehr

Dör Sleßel löppt de Kreisstraat 202, de in’n Noordwesten na Taaken geiht un in’n Süüdoosten över Boitzen in Waaschen an de Bundsstraat 75 ran. Von de K 202 geiht na Süüdwesten de K 204 af, de över Clüversbossel na Söttmer geiht un dor mit de B 75 verbunnen is. Na Noordoosten geiht en lüttjere Straat na Mulmshorn un geiht dor an de Bundsstraat 71 ran.

De nächste Autobahn is de Autobahn 1. De Opfohrt 49 Bokel liggt so söss Kilometer in’n Noorden von Sleßel un de Opfohrt 50 Stuckenbossel söss Kilometer in’n Süüdwesten.

De nächste Bahnhoff is so bi söven Kilometer wied weg in’n Süden de Bahnhoff Söttmer an de Bahnlien Hamborg–Bremen.

Scholen

De Volksschool in Sleßel hett to’n 1. Juni 1967 dichtmaakt. De Schölers gaht nu na de Grundschool Boitzen un op de Haupt- un Realschool in Söttmer. Dat ole Schoolhuus is 1856/1857 boot worrn.

Weblenken

• Websteed över dat Dörp (hoochdüütsch)