Slussdorp

Wapen/Flagg	Koort
Basisdaten
Bundsland: Neddersassen Landkreis: Oosterholt Gemeen: Worpsweed
Inwahners:	244 (2014-12-3131. Dezember 2014)
Hööchd:	5 m över NN
Postleettall:	27726
Vörwahl:	04792
Geograafsche Laag:	53° 14′ N, 8° 59′ O

Slussdorp (hoochdüütsch Schlußdorf) is en Dörp in de Gemeen Worpsweed in’n Landkreis Oosterholt, Neddersassen. Binnen de Gemeen Worpsweed billt de Oort vondaag en egen polietsche Oortschop.

Geografie

De Oort liggt in dat Düvelsmoor. Dat Water ut dat Rebeed warrt över Gravens na’n Umbeek un wieder na de Hamm hen afföhrt.

De Naveröörd sünd Winkelmoor in’n Noorden, Nee Sankt Jürgen in’n Noordoosten, Adelsdorp in’n Süden, Bargdörp in’n Süüdwesten un Mevenst in’n Westen.

Historie

Slussdorp is 1800 as dree Kilometer lang Stratendörp un findörpsche Moorkolonie in dat Düvelsmoor grünnt worrn. Dat weer de letzte Kolonie, de bi de plaanhaftige Kolonisatschoon von dat Moor anleggt worrn is un dorüm heet se ok Slussdorp. As dat Dörp anleggt worrn is, hett dat 24 Steden to 52 Morgen geven.

Verwaltungsgeschicht

In de Franzosentied von 1810 bet 1814 hett de Oort to de Mairie Worpsweed in’n Kanton Leendaal höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Moorvaagdie Huttenbusch in dat Amt Otterbarg tohöört un denn von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.

De Oort is an’n 1. März 1974 mit de Gemeenreform in Neddersassen Deel von de Gemeen Worpsweed worrn. Mit dissen Dag is ut de Gemeen Slussdorp denn de polietsche Oortschop Slussdorp worrn, de en egen Oortsvörsteiher hett.

Inwahnertall

Johr	Inwahners
1812-00-001812	128
1824-00-001824	26 Füürsteden
1848-00-001848	280 Lüüd, 29 Hüüs
1871-12-011. Dezember 1871	285 Lüüd, 39 Hüüs
1885-12-011. Dezember 1885	282 Lüüd, 41 Hüüs
1905-12-011. Dezember 1905	298 Lüüd, 49 Hüüs
1910-12-011. Dezember 1910	291
1925-00-001925	278
1933-00-001933	245
1939-00-001939	225

Religion

Slussdorp is evangeelsch-luthersch präägt un höört to dat Kaspel von de Findörp-Kark in Grasbarg.

För de Kathoolschen gifft dat in Worpsweed de Maria-Freden-Kapell, de to de Goden-Hirt-Kark in Leendaal höört. De Goden-Hirt-Kark höört siet 1. September 2012 to de Karkengemeen von de Hillige-Familie-Kark in Oosterholt-Scharmbeek.

Oortsvörsteihers

• opstunns: Rolf Ernst

Kultur

Aantenjäger in de Hall vun de Warft Grotheer

Verenen

De Missionsvereen Slussdorp, de op Louis Harms trüggeiht, is 1878 grünnt worrn. De Heimatvereen Slussdorp is 1968 grünnt worrn un hett de Warft Grotheer köfft. Dor hebbt se in’n August 1977 en Museum in apenmaakt. Op de Warft sünd fröher Bööd för de Törffohrt boot worrn.

Weertschop un Infrastruktur

Slussdorp hett en egene freewillige Füürwehr, de 1941 grünnt worrn is.

Verkehr

Dör Slussdorp löppt de Kreisstraat 31, de in’n Noordoosten na Nee Sankt Jürgen an de K 15 geiht un in’n Süüdwesten bi Umbeek an de Landsstraat 153. De K 15 föhrt in’n Süüdoosten na Tarms. De L 153 löppt in’n Süden na Worpsweed un op Leendaal to un in’n Westen na Pennigbüttel bi Oosterholt-Scharmbeek an de Bundsstraat 74. Von de L 153 geiht na Noorden de L 165 af, de över Huttenbusch na Korlshöben löppt.

De Opfohrt 16 Bremen-Noord op de Autobahn 27/270 liggt so 22 Kilometer in’n Süüdwesten von Slussdorp an de B 74. De Opfohrt 17 Dreeeck Bremen-Industriehavens op de Autobahn 27/281 liggt lieker wied in’n Süüdwesten.

De nächste Bahnhoff is so bi 17 Kilometer wied weg in’n Süüdwesten de Bahnhoff Oosterholt-Scharmbeek an de Bahnlien Bremen–Bremerhoben. Von 1911 bet 1978 hett dat ok Personenverkehr op de Bahnlien Stood–Oosterholt geven. De nächste Bahnhoff weer in Umbeek-Weyerdeelen knapp dree Kilometer in’n Westen.

Lüüd

De plattdüütsche Schriever Heinrich Schriefer is 1847 in Slussdorp boren.