Olenwoold

Olenwoold (hoochdüütsch Altenwalde) is en Oort in de Gemeen Cuxhoben in’n Landkreis Cuxhoben, Neddersassen.

Wapen/Flagg

Koort

Basisdaten

Bundsland: Neddersassen

25,03 km²

6.603 (2006-12-3131. Dezember 2006)

Inwahnerdicht:

263,8 Inwahners pro km²

1 m över NN

27478

04723

Koordinaten:53° 49′ N, 8° 40′ O53° 49′ N, 8° 40′ O

De Cuxhobener Küstenheid bi Olenwoold

Geografie

Laag von de Öörd in de Oortschop Olenwoold (Koort lett sik anklicken)

Olenwoold liggt in Wusten an’n Rand von de Cuxhobener Küstenheid na de Masch hen.

De Naveröörd sünd Süderwisch un Cuxhoben in’n Noorden, Groden in’n Noordoosten, de Westerennen von Olenbrook un de Worth in’n Oosten, Franzenborg un Godendörp in’n Süden, Ox in’n Süüdwesten, Berensch un Arensch in’n Westen un Holt un Spangen in’n Noordwesten.

Historie

Olenwoold kummt toeerst 1282 as Wolde in de Oorkunnen vör, as dat Klooster Millm na Olenwoold kamen is. Dormaals hett dat de Kapell von dat Hillige Krüüz geven, in de ok en Splinter von dat Krüüz, an dat Jesus Christus nagelt worrn is, to sehn wesen hebben schall. Disse Kapell is twüschen 1590 un 1629 verswunnen. Hertog Erik I. von Sassen hett de Kaspels Groden un Olenwoold 1324 bi Wolderik Lapp in Pand geven. 1334 weer dat mit dat Klooster toenn, de Nunnen sünd mit dat Klooster na Niewohl ümtagen. 1348 warrt de Oort denn in en annere Oorkunn al Oldenwolde nöömt.

1885 is Olenwoold tohoop mit dat ganze Amt Dorum Deel von’n Kreis Leh worrn. As de Kreis Leh 1932 denn Deel von’n Kreis Wersermünn worrn is, hett dat Dörp dat nich mitmaakt un is an’n Kreis Land Hadeln kamen.

An’n 1. Juli 1968 is de Gemeen Olenwoold mit Franzenborg, Godendörp un Ox tohoopgahn un an’n 1. Juli 1972 is Olenwoold denn Deel von de Gemeen Cuxhoben worrn.

Inwahnertall

Johr	Inwahners
1824-00-001824^[1]	58 Füürsteden
1848-00-001848^[2]	303 Lüüd, 63 Hüüs
1858-00-001858^[3]	318
1890-00-001890^[4]	419
1910-12-011. Dezember 1910^[5]	683
1925-00-001925^[4]	753
1933-00-001933^[4]	905
1939-00-001939^[4]	1.062
2006-12-3131. Dezember 2006	6.603

Religion

Olenwoold is evangeelsch-luthersch präägt un billt mit de Krüüzkark en egen Kaspel. De ole Kark, de na Cosmas un Damian nöömt weer, is 1789 afreten worrn. An de sülve Steed hebbt se denn 1791 de hüdige Krüüzkark boot.

För de Kathoolschen is de Twölv-Apostels-Kark tostännig, de siet 2008 to de Karkengemeen St. Marien in Cuxhoben tohöört.

Wapen

Dat Wapen wiest op gollen Grund dree gröne Dannen, de op en grönen Schildfoot staht. Op’n Schildfoot is ok noch en sülvern Urn to sehn.

Oortsbörgermeesters

Börgermeesters:

1957–1971: Karl Ahlf
1971-30. Juni 1972: Wolfgang Geiger

Oortsbörgermeesters:

1. Juli 1972-1991: Wolfgang Geiger
1991-1996:
1996-2001: Wolfgang Geiger
2001-2011: Werner Demuth
2011-: Ingo Grahmann^[6]

Militär

Von 1892 af an is de Heid bi Olenwoold för Manövers von dat Militär bruukt worrn. Von 1912 af an hebbt se de Heid denn ok för Tests von Schippskanonen bruukt. In’n Eersten Weltkrieg weer dor en Küstenbatterie opstellt un in’n Tweten Weltkrieg en Flak-Kanoon. 1944/1945 hett dat ok Raketentests geven.

1957 hett de Bundswehr in Olenwoold de Hinnerk-Willem-Kopp-Kasern apenmaakt, de bet 2014 bestahn hett.

Kultur

Op’n Karkhoff in Olenwoold gifft dat en Denkmaal för de Fullenen ut de twee Weltkrieg’^[7].

Verenen

De Schützenvereen is 1924 grünnt worrn.

Partnerschoppen

Olenwoold hett 1988 en Partnerschop mit Saint Avé in de Bretagne anfungen.

Weertschop un Infrastruktur

Olenwoold hett en Freewillige Füürwehr, de an’n 26. Januar 1935 grünnt worrn is. Dat Sprüttenhuus an’n Frankenweg 6 is 1979 boot worrn. Von 1979 bet 2010 weren ok de freewilligen Füürwehren von Godendörp un Franzenborg in dat Sprüttenhuus mit ünnerbrocht. To’n 1. Februar 2010 sünd düsse beiden Wehren oplööst un Deel von de Olenwohler Füürwehr worrn.

Verkehr

Oortsschild mit plattdüütschen Naam

Olenwoold liggt an de Landsstraat 135 (de fröher Deel von de Bundsstraat 6 weer), de in’n Noorden na de Bundsstraat 73 ranlöppt. De B 73 geiht in’n Noorden na Cuxhoben un is in’n Oosten mit de Opfohrt 2 Olenwoold an de Autobahn 27 (Afsnidd Cuxhoben–Bremerhoben) anbunnen. In’n Süden löppt de L 135 na Wusterheid un Millm. In’n Noordwesten löppt de Kreisstraat 3 na Holt un Spangen.

De dormalige B 6 in Olenwoold is na dat Plaanfaststellungsverforen 1954 to en moderne Straat utboot worrn, de 1956 denn trech weer.^[8] Dat Stück twüschen Olenwoold un Cuxhoben keem 1959/1960.^[8] 1971 is de Oortsdörfohrt Olenwoold op veer Sporen utboot worrn.^[8]

De nächste Bahnhoff is in Cuxhoben an de Bahnlien Bremen-Cuxhoben un de Nedderelvbahn na Hamborg, wat so bi söss Kilometer weg is. Fröher harr dat Dörp ok en egen Bahnhoff an de Lien Bremen-Cuxhoben (1896 boot), 1990 hebbt de Töög aver ophöört dor to stoppen.

Olenwoold höört ok to de Öörd, de tweesprakige Oortsschiller mit’n plattdüütschen un hoochdüütschen Naam kregen hebbt.

Scholen

De eerste School bi dat Klooster Olenwoold kummt 1487 in de Oorkunnen vör. Vondaag gifft dat de Grundschool Olenwoold un as Realschool de Geschwister-Scholl-School.

De Kinnergoorn Piratennest hett von 1972 bet 2012 in Olenwoold bestahn un is denn na Franzenborg ümtagen. Dat ole Gebüüd op dat Gelänn von’n Kinnergoorn is afreten worrn. An de sülve Steed is denn en Gebüüd för de DRK-Kita Koornblomenweg boot worrn. De Grundsteen is 2020 leggt worrn. De Kita is al in’n August 2019 in en provisorischen Bo in de Hinnerk-Willem-Kopp-Straat anfungen un will in dat ne’e Gebüüd intehn, wenn dat kumplett trech is. De Bokösten doot bi 2,9 Milljonen Euro liggen.