De Bahamas (Engelsch: The Bahamas, offiziell: Commonwealth of The Bahamas) sünd en unafhängigen Inselstaat in de Karibische See. Dor warrt Engelsch snackt. De Bahamas bestaht ut en Archipel vun 700 Eilannen un 2006 cays (oder keys) un liggt in den Atlantik, ööstlich vun den US- Bundsstaat Florida, nöördlich vun Kuba un Haiti un westlich vun de brittschen Turks- un Caicosinseln.

The Commonwealth of The Bahamas
Flagg vun Bahamas Wapen vun Bahamas
(Flagg) (Wapen)
Wahlspröök: Forward, Upward, Onward, Together

(eng., „Vörut, na boven, wieter, tohopen“)

Natschonalhymne: March On, Bahamaland
Woneem liggt Bahamas
Hööftstadt Nassau
25° 4′ N, 77° 20′ W
Gröttste Stadt Nassau
Amtsspraak Engelsch
Regeren
König
Premierminister
Parlamentaarsch Monarkie
Charles III.
Philip Davis
Sülvstännigkeit

10. Juli 1973 vun Grootbritannien

Grött
 • Allens
 • Water (%)
 
13940 km²
? %
Inwahnertall
 • 2009 afschätzt
 • Inwahnerdicht
 
309.156 (Quelle: CIA 2009)
21,8/km²
Geldsoort 1 Bahama-Dollar = 100 Cents ([[ISO 4217|]])
BBP $ (6.586 Mio. US$ (131.))

19.781 US$ (34.) $ je Kopp

Tietzoon UTC (UTC-5)
Internet-TLD .bs
ISO 3166 BS
Vörwahl ++1 (242) kiek NANP
Koort vun dat Land
Koort vun dat Land

Geschicht ännern

De eersten Inwahners vun de Bahamas sünd de Arawak ween, wat en fründlich Indianer-Volk is. Nadem Christoph Kolumbus 1492 up de Inseln an Land gahn is, hefft se dat mit de Spaniers to kriegen harrt. Ehr Land is jem wegnahmen wurrn un se mössen sik afplagen mit Slavenarbeit in de Goldminen. Dat duer keen 25 Johre, un düt Volk is utrott’ ween. Bit 1647 hett dat duert, ehr dat up de Eilannen wedder Inwahners leven schollen.

In de Johren vun den Engelschen Börgerkrieg hett en Grupp vun Puritaners dat eerste Mol en europääsche Wohnstäe up de Bahamas grünnt. Dat sünd frame Flüchtlingen vun Bermuda ween. Later hefft sik ok annere Gruppen up de Inseln ansiedelt. Offiziell hett de Archipel to Grootbritannien tohöört, man veel Hölp hefft se vun dor nich kregen. En Tied lang hett dor en Piratenrepubliek bestahn, de ehr Baas weer Edward Teach, beter bekannt as Swartbaart.

1717 sünd de Inseln denn Kolonie vun Grootbritannien wurrn. Dor is denn en Enn maakt wurrn mit de Pirateree. Na de Unafhängigkeit vun de USA hett de Brittsche Overheid Land an Loyalisten afgeven, de vun dor wegtagen sünd un so is de Tahl vun Inwahners en paar Johre lang grötter wurrn. Up de Eilannen sünd Plantagen grünnt wurrn un ut Afrika sünd dor Slaven för ranschafft wurrn. Man 1834 is mit dat Slavery Abolition Act de Slaveree för de meisten Länner vun dat Brittsche Empire afschafft wurrn un nu möss dat ohn Slaven wieter gahn.

In den Amerikaanschen Börgerkrieg hefft de Süüdstaten versöcht, över de Bahamas um de Hannelsblockade umto to seilen. In’n Tuusch gegen Kattuun hett England för Wapen un Munitschoon sorgt.

In’n Tweeten Weltkrieg sünd de Eilannen en Zentrum för de Utbildung vun dat Militäär ween. As Havanna de Grenzen vun Kuba för Amerikaners slaten hett, is up de Bahamas en groot un wichtig Zentrum för den Tourismus tostanne kamen.

Unafhängig wurrn vun Grootbritannien sünd de Bahamas an’n 10. Juli 1973, man se hören doch to den Commonwealth mit to. Hööft vun’n Staat is in’n Momang König Charles III., Gouvernöör is Cornelius Alvin Smith un de Ministerpräsident is Philip Davis.

Geographie ännern

Vun all Eilannen in dat Archipel liggt Biminy an’n dichtsten bi de Vereenigten Staten un warrt so as Döör to de Bahamas ankeken. Dat Eiland, wat an’n meisten na Süüdosten to liggt, is Groot Inagua. De gröttste Insel is Andros Island. Annere wichtige Eilannen sünd Eleuthera, Cat Island, Long Island, San Salvador Island, Acklins, Crooked Island, Eksuma un Mayaguana. De Bahamas ehre Hööftstadt Nassau liggt up Nee Providence.

 
Andros Island

De Inseln liggt alltohopen tämlich sied un sünd ok man platt, meist nich höger, as 15 – 20 Meters. De hööchste Stäe is Mount Alvernia oder Como Hill, un de is man 63 Meters hooch.

Klima ännern

Dat Klima up de Bahamas is tropisch. En grote Rull speelt dor de Golfstroom för, sunnerlich in’n Winter. Hen un wenn kaamt vundeswegen Orkanen tostanne, de up de Inseln ok mol duchtig Schaden mit sik bringt.

Inwahners ännern

Vun all de Inseln gifft dat Inwahners bloß up 40. De Amtssprake is Engelsch. 85% vun de Inwahners sünd Afroamerikaners, 12% stammt vun Europäers af un 3% kaamt annerwegens vun her.

Städer ännern

Naam Eiland Inwahners
Dunmore Town Harbour Island 1.639
Freeport Grand Bahama 26.910
Marsh Harbour Abaco 4.700
Nassau New Providence 210.832
Nicholls Town Andros 3.444
Spanish Wells Spanish Wells 1.527

Weblenken ännern