Wikipedia

Containerschipp

En Containerschipp is en Schipp, dat för den Transport vun Containers bruukt warrt. Wo veel en Containerschipp laden kann, warrt in TEU (Twenty-foot Equivalent Units, vgl. Tonnage) angeven. Dor geiht dat um de Tahl vun 20-Foot-Containers bi, de an Boord nahmen weern könnt. Midderwielen sund ok de gröttern 40-Foot-Containers begäng. Se weert in FEU (Forty-foot Equivalent Unit) meten. Vun de Midden vun de 1990er Johre af an gifft dat ok 45-, 48- un 53-Foot-Containers, un hen un wenn ok 30-Foot-Containers. Düsse mütt avers up Deck laden weern, vunwegen datt se nich in de Cellguides rinpasst, wo de Containers unner Deck insorteert weert. För sunnerlich groot Stückgoot gifft dat ok so nömmte flat racks, Open-Top-Containers oder platforms, de tohopen mit Standard-Containers laden weern könnt.

Postpanamax-Containerschipp Xin Shanghai up dr Elv bi Hamborg (2007)

Bit hen to en Frachtruum vun 3.400 TEU hefft Containerscheepe to’n Deel ehre egenen Laadböme,[1] Gröttere Scheepe bruukt meist besunnere Containerbruggen an Containerterminals, de denn in den Haben praat stahn mütt. Vunwegen, datt de Containerscheepe jummers grötter weert, loppt dat dor up to, datt amenn de Seehannel to’n groten Deel över en poor grote un zentrale Containerhabens aflopen deit, de düsse Reedschop praat stellen könnt.[2] Hüdigendags weert um un bi 90% vun dat Stückgoot in’n Welthannel mit Containerscheepe transporteert. De, wat lüttjern, Tobringer-Containerscheepe weert Feederscheepe nömmt.

Geschichte

ännern

Dat Containerschipp is 1956 utfunnen wurrn, as de US-amerikaansche Unnernehmer Malcolm McLean dormit anfungen hett, de Upleggers vun Saddelsleppers in siene Speditschoon up Scheepe to bringen un ohne den Wagen over wiete Strecken hen up See to verschicken. 1960 hett McLean de Reederee Sea-Land Corporation grünnt. Al in de eerste Hälft vun de 1960er Johre sund nee Scheepe tostann kamen, de as Semicontainerscheepe plaant weern. Dor höör de „Tobias Mærsk“ to, de 1963 in Deenst stellt wurrn is. En Johr later, 1964 is in Australien de eerste Neebo in Bedriev gahn, de as Vullcontainerschipp anleggt weer. Dat weer de „Kooringa“. In de Midden vun de 1960er Johre geev dat in de USA al 171 Containerscheepe. De meisten sund avers umboote Frachters ween. 1966 is de „Fairland“ vun de Reederee Sea-Land na Bremen kamen. Dat weer dat eerste Mol, datt en Containerschipp na Düütschland kamen is. Al an’n 31. Juli 1968 hefft in de ganze Welt al 102 Semi- oder Vullcontainerscheepe in de Updragsböker stahn oder weern al in’n Bo.[3] Vun 1968 af an gung dat los un de wichtigsten Liniendeenste sund up Containerverkehr umstellt wurrn. Anfungen hett dat mit den Noordatlantik-Verkehr vun de US-Oostküst na Westeuropa. Vun Oktober 1968 af an folg denn de Transpazifik-Verkehr twuschen de US-Westküst un Japan. Dor hett de NYK Line de „Hakone Maru“ för insett’. Enne 1968 hefft de Bremer Vulkan mit de „Weser Express“ för den Noorddüütschen Lloyd un Blohm + Voss mit de „Elbe Express“ för de HAPAG de eersten beiden Containerscheepe in Düütschland boot. Beide konnen se 750 TEU Last övernehmen. Se sund mit ehre Susterscheepe „Rhein Express“ un „Mosel Express“ up den Noordatlantik-Törn in Bedriev gahn. Ok de Hamborger Reederee August Bolten hett 1968 mit dat Containerschipp „Bärbel“ (140 Containers TEU) en Containerschipp unner düütsche Flagg insett. 1969 is de Liniendeenst Europa-Australien/Neeseeland up Containerverkehr umstellt wurrn, Enne 1971 Europa-Feernoost, un in’n Mai 1977 Europa-Süüdafrika un Europa/Karibische See/Golf vun Mexiko. 1981 folg denn de Törn Süüdafrika-Feernoost (Safari-Deenst). Dor weern toeerst mol de wichtigsten Liniendeenste mit up Container umstellt.

1984 hett de Reederee Evergreen Marine ut Taiwan to’n eersten Mol en Round the World Service anbaden. Dor gung dat mit je 12 Scheepe in beide Richtungen, dör Panamakanaal un Sueskanal dör. Düsse Deenst is um un bi 1999 upgeven wurrn. Dat weer günstiger, en Linienverkehr vun Punkt A na Punkt B an to beden. De Reederee United States Lines, de in dat sülvige Johr mit 12 Scheepe so en Deenst, bloß von West na Oost, versöch, is al na sess Maande over Kopp gahn un hett Konkurs anmellen mösst. Hüdigendags is de längste Containerlinie, de na Fohrplan lopen deit, de AE-4 Deenst vun Mærsk-Sealand. Se föhrt in 15 Weken vun de Oostküst vun de USA över de Middellannsche See, den Sueskanal, Singapur, Hongkong un Taiwan an de Westküst vun de USA. Torüch geiht dat over Japan un denn densülvigen Törn bit wedder retour an de Oostküst.

As Maate for de Containers hefft sik 20 oder 40 Foot Längde, 8 ft. Brede un 8 ft. 6 in. Hööchde dörsett’. Dat ole Maat vun 35 Foot, so, as dat vun Sealand inföhrt wurrn weer, is wegfullen. Hüdigendags weert ok jummers mehr 40-Foot un 45-Foot “High-Cube”-Containers insett’, binnen de USA gifft dat sogor al 53-Foot-Containers. Dat liggt dor an, datt in de USA gröttere Saddeltöge tolaten sund, as in Europa. De Container is de ideale Transport-Kassen for den Verkehr vun Huus to Huus wurrn.

Vun 1990 af an weert ok Open-Top Containerscheepe boot. Dat sund Scheepe, de hefft keene Lukendeckels mehr over den Laderuum (oder blot noch over den eersten un tweeten Laderuum achter den Wellenbreker). So könnt se gauer be- un utladen weern un dat Gewicht vun de Lukendeckels warrt ok inspaart. Dor is en speziellen Bug gegen hoge Bulgen for nödig un dat Schipp bruukt ok sunnerlich starke Pumpen. Weltwiet weer de Bell Pioneer dat eerste Schipp vun düsse Boaart. De bitherto eenzigsten groten Containerscheepe vun düsse Aart hett Nedlloyd bedreven, later Royal P&O Nedlloyd NV, nu Mærsk. Dat sund de 5 Panamax-Scheepe vun den Typ Nedlloyd Europa ween, de 1991 un 1992 boot wurrn sund. Dor sund denn 1994 noch de beiden eersten Postpanamax-Open-Top-Scheepe up de ganze Welt tokamen. Dat sund de Nedlloyd Hongkong un de Nedlloyd Honshu ween. Vunwegen de Stevigkeit un de Sekerheit vun dat Schipp un ok, vunwegen dat sik de Saak amenne verlohnen schall, is man dor wedder vun afkamen, Open-Top-Scheepe mit mehr as 1.000 TEU to boen. Dat is ja so ween, dat vunwegen dat Fehlen vun de Lukendeckels, bi den Rest vun dat Schipp stevigern Stahl insett weern möss un bovenhen ok noch de Gurtung wat stiever maakt weern möss. Dat weer amenne to düer. Denn is ok noch en högern Freeboord nödig, dormit nich so veel Seewater rinlopen kann (Kiek bi de Feederscheepe vun de J.J. Sietas-Warft, wo dat ok blot man in de middelsten Laderüüme keen Deckels mehr gifft, man dorfor Lukenkumminge, de höger trocken sund.)

Tosamenarbeit

ännern
 
Dat Feederschipp MSC Rita warrt laden in Kopenhagen.

1969 is up den Törn “Europa-Australien/Neeseeland” de Liniendeenst up Containervekehr mit Scheepe vun de 2. Generatschoon umstellt wurrn (ANZECS-Deenst). Düsse Deenst is grünnt wurrn as en Tosamenarbeit vun Hapag-Lloyd ut Düütschland, de Overseas Containers Limited (OCL) ut Grootbritannien (en Bund vun fiev grote engelsche Linien-Reedereen), de Associated Container Transportation (ACT) ut Grootbritannien, de Nedlloyd ut de Nedderlannen, de Australian National Line un de Shipping Company of New Zealand.

De wichtigste Törn in de Seefohrt mit de meiste Fracht is de „Europa-Feernoost“ Törn. 1968 harrn dor de groten Reedereen beslaten, up Containerverkehr um to stellen. Vun 1971 af an geev dat hier de eerste Tosamenarbeit. Dat wer de „TRIO-Deenst“ (grünnt vun Reedereen ut dree Länner). Up Containerverkehr um to stellen hett in de dormolige Tied so unbannig veel Geld köst, dat keen enkelte Reederee dat alleen betahlen konn. De TRIO-Deenst hett dormols de gröttsten un snellsten Containerscheepe vun de 3. Generatschoon in de Tied vun November 1971 bit Juli 1972 in Fohrt brocht. De TRIO-Deenst is up’e Been stellt wurrn vun de Reedereen NYK Line ut Japan (3, vun 1976 af an 4 Scheepe), Hapag-Lloyd ut Düütschland (4, vun 1981 af an 5 Scheepe), Overseas Container Line (OCL) ut Grootbritannien (5, vun 1989 af an 7 Scheepe) un Ben Line-Ellerman ut Grootbritannien (3 Scheepe). OCL is later vun P&O overnahmen wurrn. De TRIO-Deenst is Anfang 1991 uplööst wurrn, man Hapag-Lloyd un NYK arbeit bit up düssen Dag fudder, mit annere Reedereen, tohopen.

Eene tweete Grupp weer vun 1972 af an de „Scandutch Service“ vun de Reedereen Wilh. Wilhelmsen ut Norwegen, Det Østasiatiske Kompagni (EAC) ut Däänmark, Broström ut Sweden un Nedlloyd ut de Nedderlannen. CGM ut Frankriek is 1973 biträen un Malaysian Intern. Shipping Co. (MISC) hett vun 1977 af an mitmaakt. Ok düsse Allianz is 1991 toenne ween.

Eene drudde Allianz is 1975 grünnt wurrn mit den “ACE-Deenst” (Asian Container Europe) vun de Reedereen K-Line ut Japan, Orient Overseas Container Line (OOCL) ut Hongkong, de Neptune Orient Lines (NOL) ut Singapur un de Compangnie Maritime Belge (CMB) ut Belgien.

Vun 1991 bit 1996 hett dat en Tosamenarbeit geven twuschen Mærsk Line un P&O. Vun 1996 af an hett avers de gröttste Reederee, de Mærsk Line mit de amerikaansche Sea Land Corp. in de ganze Welt tohopenarbeit’. Dat hett so goot klappt, datt Mærsk de US-Reederee 1999 meist heel un deel overnahmen hett.

Vun 1991 bit 1993 hett dat den BEN-EAC-Deenst geven. Dat sund de dree Reedereen ut Skandinavien ween, tohopen mit Ben Line un Ellermann. De BEN-EAC-Deenst is 1993 heel un deel vun de Mærsk-Line overnahmen wurrn.

Vun 1996 bit 2001 hett dat de “Global Alliance” geven. Dor hefft de Reedereen Hapag-Lloyd, NYK, NOL un P&O achter steken. Nadem Royal Nedlloyd mit P&O tohopengahn is, is se 1997 ok biträen.

1977 gung dat los mit den Containerverkehr up den Törn “Europa-Süüdafrika”. Dat weer de „SEACS“-Deenst, de grünnt wurrn weer vun de Reedereen „Deutsche Afrika Linien, Hbg.“, Compagnie Maritime Belge, Royal Nedlloyd, Overseas Container Line (later P&O) un Safmarine ut Süüdafrika. Hier sund 9 moderne Containerscheepe insett wurrn. Se konnen je 2.400 TEU upnehmen un weern utrüst’ mit en Tweeschruven-Dieselmotor. Düsse Deenst warrt ok hüdigendags noch bedreven vun Mærsk Line, Safmarine, CGM (blot bit Enn vun de 90er Johre), un Deutsche Afrika Linie. Vun Februar 2006 af an maakt dor Mitsui-OSK Lines noch mit. Midderwielen weert moderne 4.500-5.000 TEU Scheepe (Sling 1) un 1.800 TEU Scheepe (Sling2) insett’.

Tosamenarbeit hüdigendags

Sülvstännig over de ganze Welt hen opereert de groten Reedereen:

Linien- un Containerreedereeen: Wer mit wen tohopengahn is un wer wen dalslaken hett

ännern
  • 1. September 1970: Hapag un NDL gaht tosamen to de Hapag-Lloyd AG, Hamburg/Bremen. Gellen schall dat al vun den 1. Januar 1970 af an.
  • 1971: Tosamensluss vun de veer gröttsten nedderlannschen Reedereen to de Royal Nedlloyd.
  • 1. Januar 1987: P & O overnummt de Overseas Container Lines heel un deel.
  • 1988: Sealand Corp. overnummt de United States Lines, de over Kopp gahn weer (Konkurs).
  • 1988: Hanjin Container Lines un Korea Shipping Corp. gaht tohopen un nömmt sik nu Hanjin Shipping
  • 1993: Ben Line/EAC weert dalslaken vun de Mærsk Line.
  • 1994: Senator Line, Bremen un DSR, Rostock gaht tohopen.
  • 1995: CP Ships sluckt CAST, London, dal.
  • 1996: Safmarine nummt CMBT, Antwerpen, over.
  • 1996: CMA sluckt CGM, hüdigendags heet de Reederee CMA-CGM
  • Dezember 1996: Nedlloyd un P&O Container Line gaht tohopen to de P&O Nedlloyd
  • 1997: CP Ships sluckt de Lykes Lines, Boston un Contship Containerlines, London, dal.
  • 1997: Hanjin Shipping sluckt de DSR-Senator Line, Bremen
  • 1998: Neptune Orient Lines sluckt de American President Lines
  • 1998: CP Ships sluckt de Australia-New Zealand Direct Lines, Wellington
  • 1998: CMA-CGM sluckt de Australian National Line
  • 1998: Evergreen Marine sluckt de Lloyd Triestino
  • 1998: P&O Nedlloyd sluckt de Blue Star Line
  • 1999: Safmarine Container Line warrt vun de Mærsk Line daslaken.
  • November 1999: Sea-Land Corp. warrt vun de Mærsk Line dalslaken
  • 2000: CP Ships sluckt TMM, Mexiko.
  • 2000: P & O Nedlloyd sluckt Farrell Lines, USA, dal.
  • 2002: CP Ships sluckt Italia S.A.N., Genua, dal.
  • August 2005: P&O Nedlloyd warrt vun Mærsk Line dalslaken.
  • Dezember 2005: Farrell Lines warrt vun Mærsk Line dalslaken.
  • 15. Dezember 2005: CP Ships, Canada weert vun Hapag-Lloyd dalslaken.
  • 5. Januar 2006: CMA-CGM sluckt Delmas dal.
  • 1. Dezember 2007: Hamburg Süd nummt de Liniendeenste vun Costa Container Lines S.p.A. (CCL) over.

Wat sik in de Technik daan hett

ännern

Aktuell

ännern
 
Dat bitherto gröttste Containerschipp unner franzöösche Flagg, dat jemols den Hamborger Haben anlopen hett: De CMA CGM Christophe Colomb an'n 13. Juli 2010

In’t Johr 2008 is de MSC Daniela in Deenst nahmen wurrn. Se höört de Mediterranean Shipping Company (MSC) to. Dat Schipp is 366 m lang un 51,2 m breet un passt dor just mit in den neen Slüsenkanal vun den Panamakanaal. De so nömmte „Megaboxer“ is vun den Germaanschen Lloyd klassifizeert wurrn un kann 13.800 TEU upnehmen.[4] Dat Typschipp vun de MSC-Daniela-Klass weer de Anfang vun en Reege vun Susterscheepe. Dor höört ok de CMA CGM Christophe Colomb mit to, de avers en annern Motor hett.

In dat Johr 2006 konn dat gröttste Containerschipp 14.000 bit 15.000 TEU an Boord nehmen. Dat weer de „Emma Mærsk“, de to dat Modell vun de Emma-Mærsk-Klass wurrn is. Se steiht in Deenst vun de Mærsk Line. Vun düssen Schippstyp sund acht Scheepe boot wurrn. Twuschen Harfst 2006 un Anfang 2008 is um un bi jeden tweeten Maand en ne’et Schipp vun düsse Aart in Bedriev gahn.

 
Hapag-Lloyd-Containerschipp Colombo Express up siene Jumfernreise in’n Hamborger Köhlbrand an’n 29. April 2005

An’n 31. März 2005 hett de Warft Hyundai Heavy Ind. ut Ulsan in Süüdkorea de Colombo Express an Hapag-Lloyd in Hamborg utlevert. Dat weer dat eerste Schipp ut en Reeg vun acht Scheepe mit 8.750 TEU. Düsse Scheepe weert andreven mit en Dieselmotor vun den Typ MAN-B&W 12K98ME mit 93.500 PS. Düsse Motortyp mit den Naam „ME“ is en Aart Vorweser to en Common-Rail-Dieselmotor, vunwegen dat de enkelten Zylinders nich vun een gemeensom Kraftstoff-Hoochdruckrohr spiest weert („Common Rail“), man ganz na de Konventschoon jedeen vun en egen Kraftstoffpump, de avers over en gemeensom Hydrauliksystem andreven un anstüert weert. De Scheepe hefft de Anslüsse for 730 Kullcontainers.

De Scheepe mit den meisten Platz for Kullcontainers sund de, de to de “Monte“-Klass mit 5.500 TEU un to de “Rio“-Klass mit 5.905 TEU tohöörn doot. Se fohrt for Hamburg-Süd un hefft 1.365 Anslüsse for Kullcontainers. Alltohopen bedutt dat, datt dor um un bi 2.500 Kullcontainers an un unner Deck upnahmen weern könnt.

In’n November 2005 is mit de Kyoto Express dat tweete Schipp vun de Colombo-Express Klass feerdig wurrn. Se is an’n 18. November 2005 in Yokohama döfft wurrn. Dat drudde Schipp is de Chicago Express, de in’n März 2006 aflevert wurrn is. Hapag-Lloyd hett 2005 mit de Savannah Express un de Houston Express twee Susterscheepe overnahmen, de en beten wat lüttjer ween sund. Se hefft beide 8.400 TEU un 104.000 tdw upnehmen konnt un sund in duerhaftige Charter vun de „Noorddüütsche Vermögen“. Boot wurrn sund de beiden Scheepe bi Daewoo H. Ind. in Süüdkorea. In’n Januar 2006 hett Hapag-Lloyd noch veer Scheepe mit 8.750 TEU bi de Hyundai H. Ind. in Updrag geven. So sund midderwielen 12 Scheepe vun düssen Typ unnerwegens oder bestellt. De düütsche Reederee Claus-Peter Offen (Hamborg) bestell 2003 bi Samsung Heavy Industries negen Containerscheepe mit je 9.200 TEU. De Scheepe weert for je acht Johre an de MSC in Genever verchartert. In’n Juli 2005 sund de eersten neen Scheepe up den Naam MSC Pamela un MSC Susanna döfft un noch in’n Juli 2005 aflevert wurrn. Noch in densülvigen Maand hett MSC de beiden Scheepe avers köfft un nich mehr chartert. Se sund over allens 336,70 m lang twuschen de Lote vun 321 m un 45,60 m breet. An’e Sieten sund se 27,20 m hooch un de Deepgang liggt bi maximal 15 Meters. Andreven weert se vun en MAN-B&W 12K98MC Diesel mit 68.640 KW/93.500 PS for 25 Kn. To’n eersten Mol is dor en Containerschipp 45,60 m breet mit ween. So könnt de Scheepe unner Deck in tein Lagen 16 Containers een neven den annern unnerbringen un up Deck könnt nu 18 un nich blot 17, as vördem, een neven den annern stahn. MSC hett 2004 noch veer annere Scheepe vun den Typ „Pamela“ up egen Reeknung bestellt.

In’n August 2005 hett Claus-Peter Offen veer Containerscheepe bi de Hyundai Heavy Industries bestellt, de noch mol grötter ween sund un je 9.700 TEU upnehmen konnen. Se schollen 2008 utlevert weern un 350 m lang, 42,80 m breet un an’e Sieten bi 27,20 m hooch ween. Andreven weern schollen se mit en MAN-B&W 12K98MC Diesel mit 93.500 PS. En Charterverdrag is bither to noch nich afslaten wurrn.

COSCO Pacific hett in’n Januar 2005 veer Containerscheepe bi Hyundai Heavy Industries mit je 10.000 TEU bestellt. Se sund 349 m lang un 45,60 m breet. Up de inheemsche Warft bi COSCO-Kawasaki Heavy Industries in Nantong in China sund noch mol fiev Eenheiten over je 8.500 TEU ordert wurrn. Verchartert weert se over Costamare. Se hefft en MAN-B&W 12K98ME Diesel mit 101.000 PS oder 94.000 PS for 25 kn. In’n Mai 2005 hett COSCO noch mol veer Containerscheepe mit 10.000 TEU bi de COSCO-KHI Nantong Warft in Updrag geven. All düsse neen Scheepe schollen vun 2008 af an utlevert weern.

Mærsk-Sealand harr bit Mitt 2004 bi de Odense Staalskibsværft alltohopen 14 grote Containerscheepe bestellt. In dat neegste Johr bit Mitt 2005 is düsse Updrag noch mol um sess Scheepe upstockt wurrn up alltohopen 20 Scheepe. Dor de lesten beiden Scheepe vun schollen 2011 utlevert weern. Offiziell is seggt wurrn, düsse Scheepe konnen 7.500 TEU upnehmen, man in Würklichkeit passen dor 9.500 TEU rin. Se hefft to’n eersten Mol en 12-Zylinder- Common-Rail-Dieselmotor vun’n Typ Sulzer 12RT-flex96C mit 93.400 PS harrt. Vun Juni 2005 af an schollen de eersten Scheepe praat stahn. In’n Juni 2005 is bekannt wurrn, dat de Updräge for de Scheepe, de vun 2006 af an utlevert weern schollen, afännert wurrn sund. Nu schollen dat noch gröttere Scheepe weern. For düsse Scheepe hett Mærsk-Sealand de eersten 14 Zylinder Dieselmotoren vun’n Typ Doosan-Sulzer 14RT-flex96C-B mit 108.900 PS up de ganze Welt in Süüdkorea bestellt. Dat eerste Schipp vun düsse Boreege is de Emma Mærsk ween. Se is in’n September 2006 aflevert wurrn.

 
Mærsk-Sealand-Containerscheepe an'n APM-Containerterminal Algeciras (2010)

Mol afsehn vun Mærsk Sealand konnen eerst vun 2010 af an Scheepe vun 12.000 TEU in Deenst nahmen weern. Dat liggt dor an, dat de Warften vörher afsluuts utlast’ ween sund mit Arbeit. Bovenhen konnen ok nich mehr Grootmotoren utlevert weern. Wenn se noch 2010 feerdig weern schollen, harrn se al 2005 bestellt weern mösst.

For de Super-Post-Panamaxscheepe weert al vun 1997 af an bit up den hüdigen Dag weltwiet de Togänge to de Habens, de Habens sülms, de Plätze an de Kajen un de Terminals utboot. All wichtigen groten Containerterminals hefft al de neen Containerbruggen upstellt, de bit 64 m rutlangen könnt un Containerscheepe utladen könnt, de bit to 55 m breet sund (22 Containers blangenanner). En poor Terminals sund as Deepwaterhaben nee anleggt wurrn, dormank de neen A.-P.-Møller-Containerterminals in Los Angeles (USA) oder Salalah (Oman). In Düütschland is al anfungen wurrn mit den Bo vun den JadeWerserPort in Willemshaven in Neddersassen. Dor könnt Scheepe ok rinfohren, wenn se vull beladen sund un bit to 16,50 m Deepgang hefft. Düsse haben schall gemeensom vun Neddersassen un Bremen betahlt un bedreven weern. Hamborg hett dor fröher mol mitplaant, is denn avers utstegen.

De wat ne’ern Smart Barges vun de Reederee “Mercurius Scheepvaart” sund sunnerlich lichte Containerscheepe for den Binnenland-Verkehr.

Andriev

ännern

De Containerscheepe in de 1. un 2. Generatschoon hefft en Eenschruven-Andriev mit Dampturbin oder Dieselmotor harrt. De Scheepe in de 3. Generatschoon (Bojohre 1971-1981) hefft al en Tweeschruven-Andriev (Turbin oder Diesel) oder sogor en Dreeschruvenandriev harrt. Se weern toeerst plaant för en Snelligkeit vun 27-28 Knutten. In düsse Generatschoon sund ok to’n eersten Mol Gasturbinenscheepe vun den Typ „Euroliner“ umsett wurrn. Düsse Andriev weer bit dorhen blot man bi de Marine bekannt. Man slank is rutkamen, datt he nich weertschopplich bedreven weern konn, sunnerlich na de Öölkrise to Anfang vun de 1970er Johre. De eersten groten Panamaxscheepe mit Eenschruvenandriev sund vun dat Enn vun de 1980er Johre af an herstellt wurrn. De hefft to’n eersten Mol starke Dieselmotoren mit 50.000 PS harrt. Vundeswegen konn man sik dormols de düern Mehrschruvenandrieve begeven. Siet dat Enn vun de 1970er Johre hett man sik vunwegen de unbannig hogen Priese för Rohööl ok de hoge Snelligkeit vun 28 Knutten begeven un hett meist all Containerscheepe mit Turbinenandriev umstellt up Dieselmotoren. So bruken se lang nich so veel Brennstoff. Ok sund Scheepe umboot wurrn vun 2 Turbinen/2 Propellers up 1 Turbine/1 Propeller. So weer dat unner annern bi de 4 Hapag-Lloyd-Scheepe vun’n Typ „Hamburg Express“. Begäng weer dormols bi meist all groten Containerscheepe en Deenstsnelligkeit vun 24 Knutten. Hüdigendags liggt se bi 25 Knutten.

De Mærsk Boston, de in’n Mai 2006 vun de Volkswerft in Stralsund, as Typschipp vun seven heel snelle Panamax-Containerscheepe, levert wurrn is, schafft mit en 12-Zylinder-Sulzer-Diesel en Deenstsnelligkeit vun 29,2 Knutten. Dor is se dat snellste Containerschipp vun de Welt mit.

Bit to dat Johr 2005 weern de grottsten Dieselmotoren, de inboot wurrn sund, 12-Zylinder-2-Takt-Reegenmotoren vun de Typen MAN-B&W 12K98ME/MC mit 94.000 PS bi 94–104 U/min un vun Wärtsilä-Sulzer 12RT-flex96C Common Rail mit 93.400 PS bi 100 U/min. In dat Containerschipp Emma Mærsk is en 14-Zylinder-Dieselmotor vun den Typ Wärtsilä/Sulzer 14RT-flex96C mit en Kraft vun 108.908 PS inboot wurrn.

Bi dat Boen vun de 12.000-15.000 TEU-Scheepe is de Andrievsanlaag en Problem. For de Reeders is dat wichtig, dat ehre Scheepe weertschopplich fohren könnt. Dor mütt se stadig weg 25 Knutten (mit Reserve) fohren könen, anners passt se nich in den weltwieten Umloop-Verkehr rin. Bi en Schipp vun düsse Grötte warrt nich mehr en 12-Zylinder-Regen-Dieselmotor mit 90.000 oder 93.000 PS inboot, so as dat bitherto begäng weer, man dor kummt en Dieselmotor to’n Insatz, de up 14-Zylinders „verlängert“ is un de en Kraft vun um un bi 110.000 PS hett. De Propeller mutt 10 m in’n Döörmeter hebben un bi 130 Tons wegen, wenn he de gröttere Kraft vun den Motor bi glieke Dreihtahl (94–104 U/min) in Fohrt vörut umsetten schall. Anners weer dat ok mööglich, en 2-Schruven-Schipp mit twee Dieselmotoren to boen. Man dor maakt all Reeders bitherto nich mit, wiel dat mehr kosten deit. Al hüdigendags sund de Dieselmotor mit de Andrievswell un de Schruve de düersten Deele vun en Containerschipp. Bovenhen kann en groten Propeller günstiger arbeiden, as twee lüttje. Hyundai un GL hefft al en Mega Carrier Projekt mit en Tweeschruvenandriev feerdig stellt, man, in over een Johr, hefft de Reedereen dor noch nich anbeten un noch keeneen köfft. Mööglich weer ok en Andriev mit en Dieselmotor, de up en Generater inwarken deit, tohopen mit en Pod-Andriev. De Generater un de enkelten Deele vun den Andriev weern denn woll wat dürer, man to’n Deel konn dat wedder inspaart weern dör en günstigern Andriev. Bovenhen konn so en groot Schipp beter manövreert weern.

Wo lang un breet en Containerschipp is

ännern

In’n Momang sund de Emma Mærsk (Bojohr 2006) un ehre Susterscheepe, de ehrn Mærsk-Naam all mit „E“ anfangt, de längsten Containerscheepe vun de Welt. Se sund 397 m lang un 56,40 m breet. De hööchste Deepgang liggt bi 16 m. In den Buuk vun dat Schipp weert bit hen to ölben Lagen vun Containers overnanner stapelt un up Deck kaamt dor noch mol bit to negen Lagen to.[5] Dat warrt taxeert, dat düsse Scheepe bi 13.000 bit 15.000 Containers upnehmen könnt. Dat gifft Anslüsse för 1.000 Kull-Containers.

 
Dat Containerschipp Edith Mærsk, en Susterschipp vun de Emma Mærsk, in Bremerhaben (2007)

Generatschonen

ännern
Containerschipp-Generatschonen
Generatschoon Johr Längde m Breede m Deepgang TEU
1. bit 1968 180 m 25 m 9,0 m 750
2. vun 1969 af an 225 m 30,5 m 11,5 m 1500
3. vun 1972 af an 287 m 32 m 12,5 m 3000
4. vun 1987 af an 275 m 39 m 13,5 m 4500
5. vun 1997 af an 325 m 41 m 14,1 m 5500
6. vun 1999 af an 345 m 43 m 14,5 m mehr, as 8000
7. vun 2006 af an 398 m 56 m 16,0 m um un bi 14.000

Containerscheepe weert in so nömmte Generatschonen indeelt. Dat Maat för en Schipp ut de 1. Generatschoon sund de Scheepe ween, de 1968 boot wurrn sund. Anfang 1969 is mit de „Encounter Bay“ dat eerste Schipp ut de 2. Generatschoon upduukt. Düsse Scheepe sund meist all 30,50 m breet ween. Dat bedüüd, an Deck konnen bit to 12 Containers, een blangen den annern, stapelt weern. Lange Tied is de böverste Grenz för de Grötte vun Containerscheepe en Längde vun 275 m un en Breede vun 32,30 m ween. Dor konnen se just mit dör den Panamakanaal dör. Düsse Scheepe sund fröher as 3. Generatschoon ankeken wurrn. Vun 1988 af an weert de Scheepe, de nich blot so breet sund, as de breedsten Panamakanaal-Slüsen, man ok so lang, as de längsten Slüsen dor mit 294 m, „Panamax“ nömmt. Ganz an’n Anfang (1972) weer dat mööglich, hööchstens 3.000 TEU up to nehmen, 1988 sund dat al 4.300 TEU ween. Hüdigendags könnt de Neebo-„Panamax“-Scheepe bit hen to 5.060 TEU laden. Noch gröttere Scheepe, de breeder sund, as 32,60 m, weert „Post-Panamax“ nömmt. De Scheepe mit mehr as 7.000 TEU hefft den Naam „Super-Post-Panamax“-Scheepe weg.

Post-Panamax-Scheepe

ännern

De eersten Containerscheepe, de breeder ween sund, as 32,30 m (so breet sund de Slüsen in’n Panamakanaal), dat weern de 5 Scheepe vun de „President-Truman-Klass“. Reederee is de „American President Lines“ in de USA ween. Boot hefft düsse Scheepe 1988 de Warften Bremer Vulkan in Veesack un HDW in Kiel. Se sund blot in den Deenst över den Stillen Ozean hen insett wurrn. Lang weern se 275 m över allens un breet weern se 38,50 m. De Bruttoregister-Tahl hett bi 61.296 BRZ legen, dat sund 53.613 tdw. Alltohopen konnen se bit hen to 4.400 TEU upnehmen. An’n Deck sund bit to 15 Containers blangenanner staut wurrn.

1991 is vun de Daewoo H. I. de CGM Normandie for de franzöösche CGM (hüdigendags CMA CGM) boot wurrn. Dor passen 4.410 TEU rup un dat is dat eerste Post-Panamax-Schipp in den Europa-Feernoost-Deenst ween. Ok hier konnen, bi en Breede vun 38 m, 15 Containers blangenanner an Deck ehrn Platz finnen. 1992 folg de „Bunga Pelangi“ for de Reederee MISC, de liek groot ween is.

1994-1995 sund de “Nedlloyd Hongkong” un de “Nedlloyd Honshu” for Royal Nedlloyd boot wurrn. Dat weern de beiden eenzigen Post-Panamax-Open-Top-Scheepe. Ut Japan sund vun dezember 1994 af an dree Scheepe vun de “NYK-Altair”-Klass for de NYK-Line feerdig wurrn, denn folgen fiev ganz lieke Scheepe for de Mitsui-OSK Lines un de “OOCL California”-Klass vun de OOCL. De konnen ro’n eersten Mol 16 Containers blangenanner an Deck packen, vunwegen datt de Scheepe 40 m breed ween sund.

Noch mol sess Post-Panamax-Scheepe vun de “APL-China”-Klass sund 1995 for de American President Line boot wurrn, dorvun je dree bi HDW in Kiel un bi Daewoo Heavy Industries. To de Tied bit Anfang 1999 hett APL mit alltohopen 11 vun düsse Scheepe de gröttste Post-Panamax-Flott.

1996 is mit de Regina Mærsk dat eerste Mega-Containerschipp in Fohrt kamen. Dat weer dat eerste Containerschipp, dat 42,80 m breed weer un ok dat eerste, dat over 300 m lang ween is. Mit en Platz for 7.000 TEU konn dat ok bi 50% mehrContainers upnehmen, as dat bit dorhen gröttste Schipp. So wiet weer bit dorhen de Grotte vun en Schipp noch nich jumpt. Dor könnt 17 Containers in blangenanner stahn. Vun dat Vörjohr 1999 af an (dormols 12 Scheepe) bedrifft de die Mærsk-Line (tohopen mit Safmarine) de gröttste Flott vun Post-Panamax-Containerscheepe. 2006 sund dat 76 Stuck ween. De düütsche Hapag-Lloyd hett sik lange Tied man blot up den Panamax-Schippstyp verlaten un hett mit de „Hamburg Express“ eerst 2001 dat eerste Post-Panamax-Schipp kregen. Dor is dat de leste vun de Gröttern Container-Reedereen mit ween, de sik en Post-Panamax-Schipp toleggt hett.

2005 is mit de „MSC Pamela“ dat eerste Containerschipp mit en Breede vun 45,60 m in Deenst stellt wurrn. Hier könnt nu to’n eersten Mol 18 Containers blangenanner stahn.

En Milensteen for de Containerfohrt hett dat denn in’n September 2006 geven. Dormols is de Emma Mærsk to Water laten wurrn. Se konn 11.000 Containers mit je 14 Tunnen Gewicht upnehmen (so rekent de Reederei Mærsk Line de Grötte ut). Dat sund bi 14.500 TEU na „normole“ Definitschoon un dat sund 4.900 TEU mehr, as de Gudrun Mærsk, de bit dorhen an’n meisten Ladung unnerbringen konn. De Emma Mærsk is 56,40 m breet un kann 22 Containers blangenanner up Deck laden.


Wo groot de Scheepe wurrn sund

ännern

Hier staht de Containerscheepe unnernanner, de to ehre Tied de gröttsten in’e Welt ween sund. Wenn sik dat um eene Bo-Reege hannelt, denn so warrt blot man dat eerste Schipp ut de Reege upschreven.


  • vörmols un hüdigendags gröttste Scheepe un ehre aktuellen Maate in Fettdruck
Bojohr Naam vun dat Schipp Längde in m Breede in m Deepgang in m TEU Brutto-Registertahl tdw Warft Reederee
Sept 2006 Emma Mærsk 397,70 56,40 16,00 14770 (11000*) 151.687 156.907** Odense Mærsk-Line/DK
Jul 2007 Cosco Asia 349 45,60 14,50 10062 114.394 109.968 Hyundai H. Ind., Ulsan COSCO/China
Juli 2006 Xin Los Angeles 336,70 45,60 14,50 9580 107.800 113.000 Samsung, Koje CSCL/China
Feb 2006 Cosco Guangzhou 350,56 42,80 14,50 9469 109.149 107.277 Hyundai H.Ind., Ulsan COSCO/China
Jul 2005 MSC Pamela 336,70 45,60 15,00 9178 107.849 110.592 Samsung, Koje MSC/CH
Jun 2005 Gudrun Mærsk 367,28 42,80 15,50 (7500) ~9500* 97.933 115.700 Odense Mærsk-Line/DK
März 2005 Colombo Express 335,07 42,87 14,60 8749 93.750 104.400 Hyundai, Ulsan Hapag-Lloyd/D
Dez 2004 P&O Nedlloyd Mondriaan 335,00 42,80 ?? 8450 94.724 97.612 IHI, Kure P&O Nedlloyd/GB-NL
Juli 2004 CSCL Asia 334,00 42,80 1?.?? 8498 90.496 105.000 Samsung, Koje CSCL/China
Mai 2003 OOCL Shenzhen 322,97 42,80 13,00 8063 89.097 99.518 Samsung, Koje OOCL/HK
Mär 2003 Axel Mærsk 352,10 42,80 15,00 (6600) ~9000* 93.496 109.000 Odense Mærsk-Line/DK
Sep 1997 Sovereign Mærsk 346,98 42,80 14,50 (6600) ~8300* 91.500 104.886 Odense Mærsk-Line/DK
Jan 1996 Regina Mærsk 318,24 42,80 14,50 (6000) ~7000* 81.488 90.456 Odense Mærsk-Line/DK
Aug 1995 OOCL California 276,02 40,00 12,20 4960 66.046 67.756 Mitsubishi, Nagasaki OOCL/HK
Dez 1994 NYK Altair 299,85 37,10 1?,?0 4743 60.117 63.179 IHI, Kure NYK/Japan
Feb 1991 Hannover Express 294,00 32,30 11,40 4639 53.783 67.680 Samsung, Koje Hapag-Lloyd/D
Apr 1988 Marchen Mærsk 294,12 32,22 ? (3500) ~4500* 52.191 60.639 Odense Mærsk-Line/DK
Jun 1984 American New York 290,00 32,30 ? 4400 57.075 58.870 Daewoo, Okpo Yard United States Lines/US
Mär 1984 Louis Mærsk 270,00 32,30 ? (3390) ~3700* 43.332 53.325 Odense Mærsk-Line/DK
Jun 1981 Frankfurt Express 287,73 32,28 ? 3430 57.540 51.540 HDW, Kiel Hapag-Lloyd/D
Juli 1972 Hamburg Express 287,70 32,27 ? 3010 58.088 48.453 Blohm & Voss, Hbg. Hapag-Lloyd/D
März 1972 Liverpool Bay 289,55 32,26 10,79 2987 58.889 48.542 HDW, Hbg. OCL, dann P&O/GB
Nov 1971 Kamakura Maru 289,50 32,20 ? 2500 59.295 43.403 Mitsubishi, Kobe NYK/Japan
Sep 1970 Sydney Express 217,00 30,58 11,80 1665 27.407 BRT 33.330 Blohm & Voss, Hbg. HAPAG, Hapag-Lloyd/D
Sep 1970 Melbourne Express 215,00 30,50 11,58 1?,?0 ? ~33.000 Bremer Vulkan, Vege. NDL, Hapag-Lloyd/D
Feb 1969 Encounter Bay 227,31 30,56 ? 1572 27.835 BRT 29.260 Düütschland OCL, dann P&O/GB
Aug 1968 Hakone Maru 187,00 26,00 ? 752 16.240 BRT 14.745 Mitsubishi, Kobe NYK, Showa/Japan

Wat noch seggt weern mutt (*): Wo groot en Containerschipp is, warrt weltwiet in TEU-Plätze angeven. Anners is dat bi de Reederee Mærsk-Line. Se seggt nich, woveel TEU-Plätze en Schipp hööchstens hett, man se rekent ut, woveel TEUs upnahmen weern könnt, wenn jede TEU mit 14 Tunnen beladen is. Dor kummt denn en Tahl bi rut, de ringer is, as de gröttste möögliche Tahl vun Stellplätz. Midderwielen seggt de Mærsk-Line offiziell, woveel Stellplätz de Emma Mærsk hett: Dat sund 14.770[6] De wichtigste Kenntahl för de Grötte vun en Containerschipp is de „TDW“. Dat heet „Tonnes Dead Weight“. Dor hannelt sik dat um de Last bi, de en leddig Conteinerschipp dregen kann, sunnerlich Ladung un Kraftstoff. Angaven over den Ruum in’t Schipp, as BRT oder Brutto-Registertahl sund bi en Containerschipp nich so wichtig, vunwegen datt dor so veel up Deck stapelt warrt.

(**): Bi de Containerscheepe vun de MSC-Daniela-Klass warrt offiziell seggt, se könnt 165.517 TDW upnehmen. Boot weert se vun 2008 af an. Man se sund lüttjer, as de Emma Mærsk, wenn een se utmeten deit. De Emma Mærsk un ehre Susterscheepe sund ok bi de TDW bitherto de gröttsten Containerscheepe.

Reedereen

ännern
De gröttsten Containerschipp-Reedereen Flagg (1. Mai 2005):
1. Mærsk Line (incl. Safmarine)
plus vörm. Royal P&O Nedlloyd NV		 Däänmark 387 Scheepe
162 Scheepe		 1.036.600 TEU Stellplätze
460.203 TEU Stellplätze
2. MSC Swiez 257 Scheepe 681.334 TEU Stellplätze
3. CMA CGM Frankriek 185 Scheepe 412.007 TEU Stellplätze
4. Hapag-Lloyd Düütschland 144 Scheepe 480.000 TEU Stellplätze
5. Evergreen Marine Taiwan 153 Scheepe 439.538 TEU Stellplätze
6. COSCO China 118 Scheepe 289.900 TEU Stellplätze
7. China Shipping Container Lines (CSCL) China 111 Scheepe 290.089 TEU Stellplätze
8. NYK Japan 105 Scheepe 281.722 TEU Stellplätze
9. American President Lines (incl. NOL) Singapur 99 Scheepe 315.879 TEU Stellplätze
10. Pacific International Lines Singapur 97 Scheepe
11. Zim Integrated Shipping Services Israel 93 Scheepe
12. Compañía Sud Americana de Vapores Chile 83 Scheepe 215.992 TEU Stellplätze
13. Hanjin Shipping Süüdkorea 113 Scheepe 294.500 TEU Stellplätze
14. OOCL Hongkong 70 Scheepe 237.318 TEU Stellplätze
15. Hamborg Süüd Düütschland 75 Scheepe 162.200 TEU Stellplätze

De düütsche Reederee Hapag-Lloyd AG, vun 1976 bit 1983 de gröttste Containerschipp-Reederee up de Welt, weer siet allerhand Johren nich mehr mank de „Top 10“ vun de Welt. In’n August 2005 hefft se dor avers bekannt maakt, datt se CP Ships overnehmen wullen. Dor weer dat to nödig, dat Kapital um een Milliarde Euro höger to maken. In’n Oktober weer dat so wiet un de CP Ships is overnahmen wurrn. Dor is Hapag-Lloyd denn up den veerten Platz bi de groten Reedereen mit kladdert.

An’n 11. Mai 2005 is offiziell bekannt maakt wurrn, datt Mærsk-Sealand de P&O Nedlloyd dalsluken woll. Dor woll dat Unnernehmen 2,96 Milliarden US-$ for betahlen (dat sund um un bi 2,3 Milliarden Euro). De P&O Nedlloyd-Aktie is an’n 10. Mai an de Böörs mit 41 US-Dollar betahlt wurrn. Mærsk-Sealand hett seggt, se wollen bit to’n 5. August 2005 for jede Aktie 57 US-$ betahlen, um de Reederee over to nehmen. Midde August 2005 weer Nedlloyd dalslaken. Vun Februar 2006 af an gifft dat düt Unnernehmen nich mehr. Se is heel un deel in de „Mærsk Line“ inboot wurrn. Siet dor an hett de Marktföhrer Mærsk nich blot 12 Perzent, man 18 Perzent an den Welt-Containerverkehr in siene Hand.

Kullcontainerscheepe

ännern

Containerscheepe mit mehr as 50 Kullcontainers weert ok Kullcontainerscheepe nömmt. Dat gifft jummers mehr Kullcontainers. Vundeswegen kaamt de Kullscheepe (ohn Containers) eernsthaftig in’e Bredullje. 1972 is de United Fruit (hüdigendags Chiquita) dor mit anfungen un hett Bananen in Kullcontainers transporteert. Een vun de Grünn dorför weer, datt dat Schipp in’n Haben so slanker löscht weern kann. Dor gifft dat ok Scheepe sunner Luken for, so datt de Kraan direktemang an de Containers ran kann. De eersten Kullcontainerscheepe sunner Luken sund 1999 bi HDW boot wurrn. De harrn Stellplätze for 990 TEU Kullcontainers un 33 TEU normole Containers. Düsse Scheepe fohrt for de Dole Fruit Company un bedeent de Fruchtfohrt vun Middelamerika na de USA hen. Hüdigendags is Hamburg-Süd een vun de grottsten Reedereen, de sik sunnerlich mit de Fohrt vun Kullcontainers vun un na Süüdamerika afgeevt.

Mega-Container-Carrier (Projekt)

ännern

De Germaansche Lloyd in Hamborg hett tohopen mit de Warft Hyundai Heavy Industries (HHI) Plaans for en Mega-Container-Carrier (Suezmax-Schipp) utklambüstert. Hier begeevt se sik den Een-Schruven-Motor un de Bruggen is in dat eerste Druddel vun dat Schipp, wat af vun den Motor, for sik anleggt. En Boupdrag hett dat bitherto noch nich geven. De Daten for dat Schipp sund so plaant:

Längde over allens: 382 m
Breede: 54,20 m
Deepgang: 13,50 m
Unner Deck: 6.230 Containers in 10 Lagen over 19 Reegen hen
An Deck: 7.210 Containers over 21 Reegen hen
Kraft: 2 x 45.000 kW (Pod-Andriev)
Snelligkeit: 25,2 Knoop
Produktschoonstied: negen bit tein Maande

Nadem for düssen Megacarrier keen Kunnen funnen wurrn sund, hett in’n September 2006 de Odensewarft mit dat Schipp „Emma Mærsk“ en Schippstyp henkregen, de noch mehr Fracht upnehmen kann un blot man mit eene Schruve andreven warrt. As Motor sitt dor en 14 Zylinder Wärtsilä RT-flex 96 C-B 2-Takt mit veel mehr, as 80 MW Kraft achter. Nu is dat bannig unwohrschienlich, datt bi en Schipp vun düsse Grotte noch mol en Andriev mit twee Schruven versocht warrt.

Projekte un feerdige Teeknungen for de Konstruktschoon for en Suezmax-Containerschipp mit bit to 14.000 TEU gifft dat al siet um un bi 1996. Ok sund Plaans for en Malacca-max-Schipp for 21.000 TEU al dörrekent. Dor is avers gor nich up de Möglichkeiten in de Habens (Lösch-Kapazität un Deepgang) bi keken wurrn.

Grottste Containerschipp-Flotten (Stand: Februar 2010)

ännern

Wenn dat dor na geiht, ut wat for’n Land de Egendömer kummt, denn geev dat in düsse Länner Containerschipp-Flotten mit mehr as 1000 BRT je Schipp (Tahl vun de Scheepe/Platz in dusend Standardcontainers)[7] :

  • Düütschland – 1646 / 4137
  • Japan – 332 / 1148
  • China – 308 / 655
  • Däänmark – 247 / 1107
  • Taiwan – 210 / 664
  • Grekenland – 204 / 607
  • Singapur – 158 / 373
  • Süüdkorea – 129 / 329
  • Frankriek – 86 / 326
  • Hongkong – 56 / 226

Warften

ännern

Grote Containerscheepe mit mehr as 7.000 TEU weert up düsse Warften boot:

Europa

ännern

Odense Staalskibsværft (Odense Steel Shipyard), Däänmark

Oostasien

ännern

Containerscheepe vun düütsche Warften

ännern

In de eerste Tied von de Containerfohrt vun 1968 bit 1977 sund allerhand grote Containerscheepe vund e 1. bit 3. Generatschoon up düütsche Warften boot wurrn. De weern dormols ganz vörnweg bi düsse Saak:

 
Post-Panamax-Containerschipp P&O Nedlloyd Barentsz (5468 TEU) Bj. 2000 vun de Kvaerner Warnowwarft (2001)
 
Mærsk Boston, Enn März 2006 vor de Volkswarft

In’n Momang sund de grottsten Containerscheepe, de jemols up eene düütsche Warft boot wurrn sund, vun de Volkswerft in Stralsund boot wurrn. Dat Typschipp Mærsk Boston is an’n 24. März 2006 döfft un in’n Mai 2006 aflevert wurrn. De Scheepe vun’n Typ VWS4000 sund 294,10 m lang un 32,18 m breed. Dor is Platz for 4.250 TEU up. Andreven weert se vun en Sulzer 12 RTA 96C Diesel mit 93.400 PS. Düsse Scheepe sund de snellsten Containerscheepe vun de Welt un schafft en Deenstsnelligkeit vun 29,2 Knoop. Containerscheepe for 2.500/2.700 TEU (Typ CV 2.500/2.700) weert in düssen Ogenblick bi HDW in Kiel, bi SSW in Bremerhaben, bi de Nordseewerke in Emden, bi Blohm + Voss in Hamborg, bi de Volkswerft in Stralsund un bi de Aker Werften in Wismar un Warnemünn boot.

Siet Johrenden is de Warft J. J. Sietas in Hamborg ganz vörnweg bi den Bo vun Containerscheepe bit to 1.200 TEU (Feederscheepe). Vun Anfang 2006 af an hett düsse Warft ok grottere Scheepe boot. Dor dat eerste vun is mit 1.700 TEU unner den Naam Safmarine Mbashe aflevert wurrn. Midderwielen boot düsse Warft keene Containerscheepe mehr.

Literatur

ännern


Weblenken

ännern

Belege

ännern
  1. ↑ Hartmann-Reederei: Prinzipdarstellung Containerschiff afropen an’n 30. September 2010
  2. ↑ Nasrin Khaniha und Zahra Pishgahi Fard: Globalization and Important Straits, open maakt in: The Social Sciences, 2009, Volume 4, Issue 3, Siet 304–312, up en Webstäe vun Medwell Journals, tolest afropen an’n 30. September 2010
  3. ↑ Fairplay International Shipping Journal
  4. ↑ TBH – Deutsche Schiffahrts-Zeitung, 19. Dezember 2008, S. 3
  5. ↑ TEU-Kapazitätsanalyse för de Emma Mærsk (PDF)
  6. ↑ Stellplätz vun de Emma Maerskup de Web-Stäe vun de Reederee [1]
  7. ↑ Hendrik Ankenbrand: Alles noch viel schlimmer, in: Frankfurter Allgemeine Zeitung vun’n 5. Februar 2010
Vun „https://nds.wikipedia.org/w/index.php?title=Containerschipp&oldid=1012367“