Ohrensmoor

Wapen/Flagg

Koort

Basisdaten

Bundsland: Neddersassen

3,32 km²

41 m över NN

21702

04166

Koordinaten:53° 23′ N, 9° 30′ O53° 23′ N, 9° 30′ O

Ohrensmoor (hoochdüütsch Ahrensmoor) is en Dörp in de Gemeen Ohlers in’n Landkreis Stood, Neddersassen. De Oort deelt sik op in Ohrensmoor-West, -Oost un -Noord (Depenrehmen un Lütt Ohlers).

Geografie

De Oort liggt op de Stoder Geest. Dat Water ut dat Rebeed flütt in’n Westen över de Au un in’n Oosten över de Ramm af. In’n Noorden von Ohrensmoor liggt dat Naturschuulrebeed Braken, Harslah, Kahl un Wild Moor.

De Naveröörd sünd Harsfeld in’n Noorden, Griemshorst, Kommerbusch un Remnoh in’n Noordoosten, Wiegersen un Woonst in’n Süüdoosten, Lütt Wangersen un Ohrenswohl in’n Süüdwesten, Klethen un Ohlers in’n Westen un Hollenbeek in’n Noordwesten.

Historie

Ohrensmoor is 1803 von’n hannöverschen König Georg III. as Moorkolonie mit 21 Siedlersteden mit 20 Morgen un een Schoolsteed mit teihn Morgen grünnt worrn. To de Tied harrn Klethen un Ohrenswohl Stried hatt üm den Ünnerholt för de Landstraat. De güng dor op en Damm an’t Moor langs un harr veel Utbeterarbeiden nödig.

Nadem de findörpschen Moorkolonien in’t Düvelsmoor good anlopen weren, wullen se hier nu ok en Moorkolonie anleggen, de denn ok de Utbeterarbeiden an de Straat övernehmen schull. De eersten Meetarbeiden sünd 1795 daan worrn, de eersten Lüüd sünd denn 1803 optrocken un 1814 weer dat Ganze denn afslaten.

Vör 1885 weer dat Dörp in de Böörd Ohlers binnen dat Amt Harsfeld. Na 1885 hett dat denn to’n Kreis Stood höört un von 1932 af an to’n hüdigen Landkreis Stood.

1955 sünd Lüttjen Ohlers un Harslah to Ohrensmoor Noord worrn. Dat Forsthuus Wiegersen keem to Ohrensmoor un Ohrensmoor harr denn 332 Hektar. Lüttjen Ohlers is 1825 as Anbo mit 8 Siedlersteden grünnt worrn.

Von 1967 bet to’n 1. Juli 1972 weer de Oort Liddmaat von de Samtgemeen Ohlers. An’n 1. Juli 1972 keem Ohrensmoor mit de Gemeenreform in Neddersassen to de Gemeen Ohlers.

Inwahnertall

Johr	Inwahners
1824-00-001824^[1]	21 Füürsteden
1848-00-001848^[2]	121 Lüüd, 23 Hüüs
1910-12-011. Dezember 1910^[3]	138
1925-00-001925^[4]	134
1933-00-001933^[4]	147
1939-00-001939^[4]	149

Religion

Wapensteen in Ohrensmoor

Ohrensmoor is evangeelsch-luthersch präägt un höört to dat Kaspel Ohlers.

För de Kathoolschen is de St.-Michaels-Kark in Harsfeld tostännig, de siet 1. September 2010 to de Karkengemeen Mariä Himmelfohrt in Buxthu höört.

Kultur

Verenen

Au in Ohrensmoor

De Freewillige Füürwehr Ohrensmoor is 1943 grünnt worrn.

Brüük

Elk Johr in’n Februar gifft dat dat Eiersnurren, bi dat mit Musik von Huus to Huus tagen un Eier un annern Kraam snurrt warrt, de denn in’n Kroog gemeensam eten warrt.

To Pingsten warrt bi de Geschäftslüüd in’t Dörp Pingstbööm opstellt.

Weertschop un Infrastruktur

Verkehr

Ohrensmoor-West un -Noord doot an de Landsstraat 127 liggen, de in’n Noordoosten över Remnoh un Kommerbusch na Obbens un Buxthu löppt un in’n Süüdwesten över Ohrenswohl bi Wangersen an de Landsstraat 124 ran. Ohrensmoor-Oost liggt an de Kreisstraat 59, wat en Blangenstraat to de L 127 is. De K 59 geiht as K 121 in’n Landkreis Rodenborg wieder na Woonst. Von Ohrensmoor-West na Ohlers in’n Westen geiht de K 75 un von Ohrensmoor-Noord na Griemshorst in’n Noordwesten de K 79. Ans gifft dat noch en lüttjere Straat na Oosten na dat fröhere Borrel bi Remnoh un Kommerbusch hen.

De nächste Bahnhoff is de Bahnhoff Harsfeld an de Bahnlien Bremerhoben–Buxthu.