Rosenkävers

Bi de Rosenkävers (Cetoniinae) hannelt sik dat um en Unnerfamilie vun de Scarabäuskävers (Scarabaeidae). Se sünd up de ganze Welt to finnen, man an’n meisten in de Tropen. Bi 3.000 Aarden in um un bi 400 Geslechter sünd bitherto bekannt. Wat de Taxonomie vun düsse Gruppen angeiht, hefft sik de Forschers dor over in’e Plünnen. Dat gift Schrievers, de meent, de Rosenkävers weern en egene Familie mank de Böverfamilie Scarabaeoidea, man Butel &Lechen hefft se 2005 as Unnerfamilie to de Scarabäuskävers stellt. Bi allerhand Aarden glinstert de Imagines bunt as Metall. Se könnt ehr tweet Paar Flunken unner de Deekflunken to’n Flegen utfolen. De Deekflunken blievt dorbi to. Dat is man roor mank de Kävers. De adulten Kävers freet sunnerlich Plantenssapp, de ut Böme ehre Wunnen utfleten deit. De Budden wasst un weert riep in’e Eer. Se laat na Maibudden, as all Budden ut de Böverfamilie.

Rosenkävers

Systematik

Stamm:	Liddfööt (Arthopoda)
Ünnerstamm:	Tracheendeerter (Tracheata)
Böverklass:	Sessfööt (Hexapoda)
Klass:	Insekten (Insecta)
Ünnerklass:	Fleeginsekten (Pterygota)
Böverornen:	Neeflunken (Neoptera)
Ornen:	Kävers (Coleoptera)
Ünnerornen:	Polyphaga
Böverfamilie:	Scarabaeoidea
Familie:	Scarabäuskävers (Scarabaeidae)
Ünnerfamilie:	Rosenkävers (Cetoniinae)

Wetenschoplich Naam

Cetoniinae

Leach, 1815

Kennteken

Groten Rosenkäver (Protaetia aeruginosa)

Pachnoda cordata in’e Tucht, an’e Banaan.

Troer-Rosenkäver (Oxythyrea funesta)

Budden vun Cotinis mutabilis. De rechte Budde kruppt just up’n Ruggen wieter.

Wie de Gollen Rosenkäver flegen deit. Good to sehn is, datt de Deekflunken to blievt.

Euchroea coelestis ut Madagaskar

To de Rosenkävers weert u. a. de Goliathkävers (Goliathus) tellt. Dor hannelt sik dat um de gröttsten un buntesten Aarden mank de Scarabaeoidea bi. Rosenkävers weert 8 bit 110 Millimeters lang un sünd mehr oder minner platt. De Föhlsprieten bestaht ut tein Le’e, an’t Enne sitt en Küül to’n Föhlen, de ut dree Le’e tohopensett is. De Mundwarktüge sünd nich sunnerlich entwickelt.

Wie se leven doot

De Imagines freet meist bloß dör dat Licken an Fleetstoff, as Plantenssapp vun Boomwunnen, an Früchten oder Nektar. De wecken Aarden neiht avers ok zorte Blötendeelen weg (Stoffbüdels) un maakt so Blöten in’e Merse. Mank de Cremastocheilini gifft dat ok Aarden, de freet Brödels un Vörraden vun soziale Insekten. En paar Aarden sünd ok in Schiete un in de Nester vun Termiten funnen wurrn. De meisten Aarden sünd an’n Dag togange. Bloß man bi Rosenkävers könnt de adulten Deerter flegen, ofschoonst de Deekflunken to blievt: Dat tweete Flunkenpaar, wat dorachter liggen deit, kann dör en Gatt achter de Schullern utfoolt weern.

Taxonomie un Systematik

Hier unnen hoolt wi us in’n Grunne an en Klassiikatschoon vun Krikken ut dat Johr 1984, un deelt de Rosenkävers in twee Tribus un alltohopen 15 Unnertribus (Subtribus) in:

Tribus Trichiini
- Subtribus Cryptodontina (2 Geslechter; Afrotropis)
- Subtribus Incaina (3 Geslechter; Neotropis)
- Subtribus Osmodermina (1 Geslecht Holarktis, 1 Geslecht Orientalis)
- Subtribus Platygeniina (1 Geslecht; Afrotropis)
- Subtribus Trichiina (mehr as 30 Geslechter; Ne‘e Welt, Afrotropis, Orientalis)
Tribus Cetoniini
- Subtribus Cremastocheilina (bi 50 Geslechter; meist Afrotropis, man ok Nearktis un Neotropis)
- Subtribus Xiphoscelidina (bi 15 Geslechter; meist bloß Afrotropis)
- Subtribus Stenotarsiina (bi 50 Geslechter; Madagaskar)
- Subtribus Schizorhinina (mehr as 40 Geslechter; meist bloß Australien un Tasmanien, man ok Orientalis)
- Subtribus Goliathina (bi 80 Geslechter; Afrotropis, Orientalis, Nearktis)
- Subtribus Cetoniina (sunnerlich Orientalis un Afrotropis, man ok Paläarktis un Nearktis)
- Subtribus Gymnetina (bi 30 Geslechter; sunnerlich Neotropis)
- Subtribus Diplognathina (bi 20 Geslechter; sunnerlich Afrotropis)
- Subtribus Phaedimina (5 Geslechter; Orientalis)
- Subtribus Taenioderina (mehr as 30 Geslechter; Orientalis)

Hüdigendags weert avers faken ok de Goliathini as en Tribus ankeken:

- - Tribus Goliathini Latreille, 1829
    - Subtribus Coryphocerina Burmeister, 1842
    - Subtribus Dicronocephalina Krikken, 1984
    - Subtribus Goliathina Latreille, 1829
    - Subtribus Ichnestomatina Burmeister, 1842

Aarden (Utwahl)

Europa

Gollen Rosenkäver (Cetonia aurata)
Troer-Rosenkäver (Oxythyrea funesta)
Groten Rosenkäver (Protaetia aeruginosa)
Lieken Rosenkäver (Protaetia affinis)
Kopper-Rosenkäver (Protaetia cuprea)
Grönen Rosenkäver (Protaetia lugubris)
Eremit (Osmoderma eremita)

Buten Europa (Utwahl)

Mecynorhina torquata ugandensis
Goliathkäver (Goliathus spp.)
Süüdafrikaanischen Fruchtkäver (Pachnoda sinuata)
Eudicella tetraspilota

Weblenken

Rosenkävers. Mehr Biller, Videos oder Audiodateien to’t Thema gifft dat bi Wikimedia Commons.