Schanzendörp

Wapen/Flagg	Koort
Basisdaten
Bundsland: Neddersassen Landkreis: Veern Gemeen: Otterbarg
Inwahners:
Postleettall:	28870
Vörwahl:	04297
Geograafsche Laag:	53° 3′ N, 9° 9′ O

Schanzendörp (hoochdüütsch Schanzendorf) is en Dörp in de Gemeen Otterbarg in’n Landkreis Veern, Neddersassen. Binnen de Gemeen höört de Oort to de polietsche Oortschop Posthusen.

Schanzendörp billt en Gemeenschop mit Giersdörp (Giersdörp-Schanzendörp). Schanzendörp liggt op de Noordsied von de gemeensame Dörpstraat un Giersdörp op de Süüdsied.

Geografie

De Oort liggt in dat Hellweger Moor. Dat Water ut dat Rebeed flütt över Gravens na de Wümm hen af.

De Naveröörd sünd Tüchten in’n Noorden, Rootlook, Middeldörp un Postdörp in’n Noordoosten, Hintzendörp/Stellsfellen in’n Oosten, Giersdörp in’n Süden, Bauermoor, Üsermoor un Üserdicken in’n Süüdwesten un Lüttjen Hollen, Petershollen, Groten Hollen un Bassen in’n Noordwesten.

Historie

Schanzendörp is 1794 as Moorkolonie in dat Hellweger Moor op de Noordsied von de Straat grünnt worrn, de vondaag de Kreisstraat 5 billt, un Giersdörp in dat sülve Johr op de Süüdsied.

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Grasdörp in’n Kanton Achem höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Bauen in’n Kanton Achem.

De Oort hett vör 1852 to de Oostvaagdie von dat Gogericht Achem tohöört, dat 1852 denn to dat Amt Achem worrn is. Na 1885 weer dat in’n Kreis Achem. 1932 is de Kreis Achem mit’n Kreis Veern tohoopgahn un hett den ne’en un grötteren Kreis Veern billt.

Giersdörp un Schanzendörp hebbt tohoop en Buurschop billt, de later as Gemeen Giersdörp-Schanzendörp bestahn hett. De Gemeen harr bet to’n 1. Juli 1968 Bestand, as sik de Gemeen mit de dree Gemenen Grasdörp, Hintzendörp-Stellsfellen un Wümmingen to de ne’e Gemeen Posthusen tohoopslaten hett. De Gemeen Posthusen hett ok blots veer Johr bestahn un is mit de Gemeenreform in Neddersassen an’n 1. Juli 1972 oplööst un Deel von de Gemeen Otterbarg worrn.

Inwahnertall

Johr	Inwahners
1812-00-001812	98
1824-00-001824	21 Füürsteden
1848-00-001848	136 Lüüd, 21 Hüüs
1871-12-011. Dezember 1871	131 Lüüd, 21 Hüüs
1885-12-011. Dezember 1885	127 Lüüd, 20 Hüüs
1905-12-011. Dezember 1905	144 Lüüd, 23 Hüüs

Religion

Schanzendörp is evangeelsch-luthersch präägt un höört to dat Kaspel von de Lukas-Kark in Postdörp. Düsse Kark is 1852 nee boot worrn. Vörher hett de Oort to dat Kaspel von de Sigismund-Kark in Dauben tohöört.

För de Kathoolschen is de St.-Matthias-Kark in Achem tostännig.

Weertschop un Infrastruktur

För Schanzendörp is de freewillige Füürwehr Posthusen mit tostännig.

Verkehr

Dör Schanzendörp löppt de Kreisstraat 5, de in’n Noordwesten bi Bassen an de Landsstraat 156 ran geiht un in’n Noordoosten na Middeldörp un Postdörp an de L 155. Von de K 5 geiht na Süüdwesten de K 6 af, de över Bauermoor na Bauen an de L 158 föhrt. In’n Süüdoosten geiht von de K 5 de K 9 af, de över Grasdörp un Langwedelermoor na Dauben an de L 158 löppt.

De nächste Autobahn is de Autobahn 1 (Afsnidd Hamborg–Bremen). De Opfohrt 51 Posthusen liggt so fiev Kilometer in’n Noordoosten von Schanzendörp an de L 155.

De nächste Bahnhoff is so bi söven Kilometer wied weg in’n Süden de Bahnhoff Ädelsen an de Bahnlien Wunsdörp–Bremen. De Bahnhoff Otterbarg an de Bahnlien Hamborg–Bremen liggt so acht Kilometer in’n Noorden.