Weertschop von Belize

De Weertschop von Belize is vör allen von de Bueree un von’n Tourismus präägt. Belize is Maat von de Karibische Gemeenschop. Betahlt warrt mit’n Belize-Dollar.

Tree Map von de Exportgöder von Belize för dat Johr 2017

Dat BIP hett 2016 1,770 Milljarden US-Dollar bedragen, wat mit en Korrektur för Koopkraftparität 3,088 Milljarden US-Dollar entsprickt. Pro Kopp entsprickt dat 8186 US-Dollar.

Bueree

Citrus Products of Belize in Pomona

De wichtigsten Branchen för Belize sünd de Anbo von Bananen, Zitrusfrücht un Zuckerrohr för’n Export. De Zuckerindustrie liggt ganz in de Hand von Belize Sugar Industries, de Zitrusindustrie vör allen bi Citrus Products of Belize un de Bananenindustrie bi de Banana Growers Association.

Von 1994 bet 2016 sünd in Belize von Fruta Bomba ok Papayas för’n Export anboot worrn. Dat Ünnernehmen hett ut weertschopliche Grünn dichtmaakt. De 250 Arbeiders hebbt jemehr Jobs verloren.

In de Johren 1980 hett de Hershey Company in dat Stann Creek Valley an’n Hummingbird Highway en Kakaofarm bedreven. Tosätzlich hett dat Ünnernehmen Kakaobohnen von private Produzenten opköfft, de in’n Süden ünner annern in de Toledo Cacao Growers Association (TCGA) tohoopslaten sünd. Von 1984 bett 1987 hett Hershey’s mit de Regeren von Belize in dat Belize Accelerated Cacao Production Project tohooparbeidt. In de twete Hälft von de Johren 1980 is de Weltmarktpries för Kakao aver üm üm un bi 70 % dalgahn. Dorüm hett sik dat Ünnernehmen 1993 ut Belize trüggtagen. In düsse Lück is denn Green & Black’s ut Grootbritannien rin, de sik dorför insett hebbt, dat de Farmen Fairtrade un Bio bedreven warrt. Dat Ünnernehmen is 2005 von Cadbury opköfft worrn un Cadbury 2010 wedder von Kraft Foods (siet 2012 Mondelez International).

2010 hett sik tosätzlich de Maya Mountain Cacao Limited billt, de Kakaobohnen von lokale Produzenten opköfft un direkt vermarkten deit.

Von düsse Exportartikels afsehn stellt de Bueree von Belize vör allen för’n Egenbedarf her. En groten Deel von de eenfachen Farmers kummt kuum över de Subsistenzweertschop rut. En modeerne Bueree, de op Erdrag utricht is, hett sik vör allen bi de ethnische Minnerheit von de Mennoniten rutbillt, de ünner annern Grööntüüg anboot, Höhnertucht bedrievt un Melkveh hollt.

Finanzweertschop

De eerste Bank in dat Land is 1903 von Investoren ut Mobile (Alabama) grünnt worrn un hett Bank of British Honduras heten. Düsse Bank is 1912 von de Royal Bank of Canada övernahmen worrn. 1987 hett Michael Ashcroft düsse Bank köfft un ehr den Naam Belize Bank geven. De twete Bank in Belize weer de Barclays Bank DCO, de 1949 in Belize-Stadt apenmaakt hett. Tosätzlich gifft dat vondaag ok verscheden Genossenschaftsbanken in dat Land.

De Zentraalbank von Belize besteiht siet 1982.

Fischeree

Fischerlüüd in Placencia

En kommerzielle Fischeree is in Belize toeerst in de Johren 1960 opkamen. Ünner annern warrt Karibik-Langusten fungen. En wichtige Rull för de Gesamtweertschop hett de Fischfang aver to keen Tied speelt. De Fischerlüüd hebbt sik för Verkoop un Export to twee Fischeree-Genossenschaften (fröher veer) tohoopdaan.

Von 1982 af an sünd ok de eersten Shrimp-Farmen opkamen. Shrimps sünd vondaag en wichtigen Exportartikel för Belize. Intressenverband för de Industrie is de Belize Shrimp Growers Association.

Forstweertschop

Dat Hauen von Holt (Campecheholt un later denn Mahagoni) dör de Baymen weer de Grund, worüm de Kolonie Brietsch-Honduras, ut de later Belize worrn is, in dat 17. Johrhunnert anleggt worrn is. Bet to Anfang von dat 20. Johrhunnert is dat de wichtigste Industrie för Belize bleven. De Holtindustrie hett dat Land so dull präägt, dat dor de Utdruck Forestocracy för opkamen is. Vondaag speelt de Forstweertschop aver keen grote Rull mehr.

Industrie

In de Johren 1980 hett de USA ünner Regel 807 von de Tariff Schedules of the United States (Tolltarife von de USA) verscheden Länner ut de Karibische Region verlöövt, Woren ut de USA to importeren, to verarbeiden un wedder in de USA to exporteren, ahn dat se dor Toll för betahlen mööt. Dat hett dor to föhrt, dat sik in Belize en Reeg Sweatshops billt hebbt, in de Textilien för de USA herstellt warrt. In de Johren 1980 weer de Textilindustrie de tweetwichtigste Exportbranche in Belize, is aver in de Johren 1990 op’n veerten Rang fullen. Belize stellt ok in de Johren 2010 noch Textilien för de USA her, aver dat is nu keen groten Weertschopsfaktor för dat Land mehr.

Rohstoffen

Öölpump in Belize

2005 hett dat Ünnernehmen Belize Natural Energy in Spanish Lookout Eerdööl funnen, dat sietdem fördert warrt.

Tourismus

De Tourismus speelt för Belize en jümmer gröttere Rull. In dat Binnenland warrt vör allen de Maya-Bargen in de Distrikte Cayo un Stann Creek besöcht, de Maya-Ruinen un wille Natur mit Waterfäll, Höhlen, Bargen, rore Deerten un Natschonaalparks to beden hebbt. En noch wichtigere Rull speelt aver de Küst un dat Belize-Riff, de för Baadtouristen, Dukers un Snorklers intressant sünd.

De Tall von Övernachtungsgäst is von 277.135 in dat Johr 2012 op 489.261 in dat Johr 2018 stegen. 2018 kemen dorvon 65,4 % ut de USA, 7,2 % ut Kanada, 3,1 % ut Grootbritannien

Besünners de Ökotourismus warrt in Belize vörandreven.

De Krüüzfohrt-Tourismus, de wieder in’n Noorden in Mexiko an de Riviera Maya un Costa Maya en wichtige Rull speelt, hett för Belize keen so groot Bedüden. Dat liggt dor an, dat Anleggers för de groten Scheep fehlt. De Krüüzfohrt-Touristen, de na Belize kaamt, warrt von dat Krüüzfohrt-Schipp op Reed mit Transfer-Bööd na dat Fort Street Tourism Village in Belize-Stadt bröcht.

Verkehr

Philip S. W. Goldson International Airport

De eenzige internatschonal Flegerhaven is de Philip S. W. Goldson International Airport in Belize-Stadt. De Flegerverkehr över de verscheden regionalen Flegerplätz speelt en wichtige Rull för den Binnenverkehr mit de Regionen von Belize, de wieder af liggen doot.

Bahnverkehr gifft dat in Belize gornich. De Seeverkehr löppt över’n Port of Belize in Belize-Stadt un över’n Haven von Big Creek bi Independence. De Commerce Bight Port bi Dangriga is 2013 dichtmaakt worrn. Dör den ringen Deepgang von de Havens in Belize köönt gröttere Scheep in dat Land nich anleggen.

De gröttste Deel von’n Binnenverkehr löppt över de veer Highways (George Price Highway, Hummingbird Highway, Philip Goldson Highway un Southern Highway). Dat Stratennett von Belize is aver blots slecht an de Naverlänner anbunnen. Dat gifft blots twee offizielle Grenzövergäng. Eenmaal in’n Noorden an’n Philip Goldson Highway in Santa Elena na Mexiko mit de Grootstadt Chetumal un de annere bi Benque Viejo del Carmen an’n George Price Highway na Guatemala un na de Stadt Melchor de Mencos. En drüdden schall in Tokumst an de San Antonio Road boot warrn un ok na Guatemala föhren.

De Binnenverkehr per Boot op de Strööm von dat Land un an de Küst hett fröher en temlich wichtige Rull speelt. Bet in de Midd von dat 20. Johrhunnert hett dat gorkeen Straten geven, de in dat Binnenland un na’n Süden föhrt hebbt. Vondaag speelt de Bootsverkehr aver blots noch en lüttje Rull.

Versorgung

Elektrischen Stroom warrt von Belize Electricity Limited herstellt. Dat Waternett bedrifft Belize Water Services Limited.

Illegale Weertschop

Belize is en wichtig Transitland för den illegalen Drogenhannel twüschen Süüdamerika un de USA.

Daten

Johr	1980	1985	1990	1995	2000	2005	2006	2007	2008	2009	2010	2011	2012	2013	2014	2015	2016	2017
BIP in Milljarden Dollar (PPP)	0,20	0,29	0,62	0,94	1,36	1,98	2,14	2,22	2,34	2,37	2,48	2,59	2,73	2,80	2,96	3,11	3,13	3,21
BIP per Kopp in Dollar (PPP)	1367	1717	3281	4324	5456	6799	7098	7126	7254	7350	7668	7785	8017	7994	8295	8480	8329	8324
BIP-Wassdom in % (real)	5,0	−1,4	11,2	0,7	13,0	2,6	4,6	1,1	3,2	0,8	3,3	2,1	3,7	0,7	4,0	3,8	−0,5	0,8
Inflatschoon in %	7,0	4,1	2,0	2,9	0,6	3,7	4,2	2,3	6,4	−1,1	0,9	1,7	1,2	0,5	1,2	−0,9	0,7	1,1