Fehrenbrook

Wapen/Flagg	Koort
Basisdaten
Bundsland: Neddersassen Landkreis: Rodenborg Samtgemeen: Sürsen Gemeen: Annerlingen
Inwahners:
Postleettall:	27446
Vörwahl:	04284
Geograafsche Laag:	53° 25′ N, 9° 20′ O

Fehrenbrook (hoochdüütsch Fehrenbruch) is en Dörp in de Gemeen Annerlingen (Samtgemeen Sürsen) in’n Landkreis Rodenborg, Neddersassen.

Geografie

In’n Westen von’n Oort hett de Duxbeek sien Born. Dat Water in’n Noordoosten flütt över den Reither Beek na de Bever hen af.

De Naveröörd sünd Reith un Bredenbeek in’n Noordoosten, Wohlers in’n Oosten, Winnerswohl in’n Süüdoosten, Grafel, Mojenhoop un Sprakel in’n Süden, Ohrel in’n Süüdwesten un Malst, Stüh un Farm in’n Noordwesten.

Historie

To de öllsten Funnen höört de Steenkist von Fehrenbrook ut de Jungsteentied.

De hüdige Oort is üm 1826 rüm ünner Moorkommissar Friedrich Witte grünnt worrn. Vörher weer dat Rebeed en fuchten Brook mit Büsch. 1830 sünd dor denn ölven Siedlers hentagen, de jedereen 15 Hektar kregen hebbt. De Hüüs legen all an de Oostsied von de Straat. Eerst 1921 is dat eerste Huus an de Westsied boot worrn.

In’n Eersten Weltkrieg sünd fiev Soldaten ut Fehrenbrook fullen oder vermisst.

Verwaltungsgeschicht

De Oort hett vör 1859 to de Böörd Sürsen von dat Amt Zeven tohöört. Mit de Verwaltungsreform von 1859 in dat Königriek Hannover is de Böörd Sürsen denn an dat Amt Bremervöör wesselt. Na 1885 weer dat in’n Kreis Bremervöör. 1977 is de Oort Deel von’n Landkreis Rodenborg worrn.

1929 is Fehrenbrook Deel von de Gemeen Farm worrn. To’n 1. Oktober 1949 is Fehrenbrook denn aver wedder en egenstännige Gemeen worrn.

De Oort is 1968 Deel von de Gemeen Grafel worrn. Aver al an’n 1. März 1974 sünd Fehrenbrook un Grafel bi de Kommunalreform in Neddersassen tohoop an de Gemeen Annerlingen kamen.

Von 1965 bet 1968 weer Fehrenbrook as egenstännige Gemeen Deel von de Samtgemeen Sürsen. Von 1968 bet 1974 leeg de Oort blots noch as Deel von de Gemeen Grafel in de Samtgemeen. De Samtgemeen Sürsen, so as se vondaag bsteiht, is denn 1974 grünnt worrn.

Inwahnertall

Johr	Inwahners
1848-00-001848	66 Lüüd, 10 Hüüs
1871-12-011. Dezember 1871	61
1910-12-011. Dezember 1910	63
1949-10-011. Oktober 1949	134

Religion

Fehrenbrook is evangeelsch-luthersch präägt un höört to dat Kaspel von de Lamberti-Kark in Sürsen.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Kultur

En Denkmaal för de Fullenen ut de twee Weltkrieg’ steiht in Sürsen bi de Kark.

Verenen

Fehrenbrook hett en egene freewillige Füürwehr, de 1948 grünnt worrn is. Dat eerste Füürwehrhuus is 1952 boot worrn. 2001 hett de Oort en neet Füürwehrhuus kregen.

Weertschop un Infrastruktur

Verkehr

Dör Fehrenbrook löppt de Kreisstraat 109, de in’n Noorden na Farm geiht un in’n Süden na Annerlingen un Sürsen an de Bundsstraat 71 ran. Lüttjere Straten gifft dat ans na Reith, Stüh, Winnerswohl un Ohrel.

De nächste Autobahn is de Autobahn 1 (Afsnidd Hamborg–Bremen). De Opfohrten 47 Zittens un 48 Elsdörp doot so 25 Kilometer in’n Süüdoosten/Süden von Fehrenbrook liggen.

De nächsten Bahnhööv sünd so bi acht Kilometer wied weg in’n Noorden in Kutenhult un Brest-Aasp an de Bahnlien Bremerhoben–Buxthu.

De Hauptstraat dör dat Dörp is siet 1962 asphalteert. Stratenlanternen gifft dat siet 1972.

Literatur

• Dieter Borchers: Dorfchronik der Dörfer Grafel, Fehrenbruch, Winderswohlde, Mojenhop, Sprakel. 2002

Weblenken

• Websteed över dat Dörp (hoochdüütsch)