Glinst (hoochdüütsch Glinstedt) is en Dörp in de Gemeen Gnarrenborg in’n Landkreis Rodenborg, Neddersassen. To Glinst höört ok de Oortsdeel Forstoort-Anfang.

Wapen/Flagg Koort

Wapen vun Glinst

Glinst
Laag vun Glinst in Düütschland
Basisdaten
Bundsland: Neddersassen
Landkreis: Rodenborg
Gemeen: Gnarrenborg
Flach: 20,80 km²
Inwahners: 604 (2011-12-3131. Dezember 2011)
Inwahnerdicht: 29 Inwahners pro km²
Postleettall: 27442
Vörwahl: 04285
Geograafsche Laag:
Koordinaten:53° 21′ N, 9° 4′ O
53° 21′ N, 9° 4′ O
KuhsKuhstermoorGlinstFohrendörpKlenkendörpBrillitKorlshöbenLangenhusenGnarrenborgFindörp (Düvelsmoor)Barkhusen (Gnarrenborg)Augustendorp
Laag von Glinst in de Gemeen Gnarrenborg (Koort lett sik anklicken)

Karte

Geografie ännern

Glinst liggt an de Süüdkant von’t Düvelsmoor op’n Geestrand, de hier bi’n Steenbarg bet op 41 m över NN hoogreckt. Na Noordoosten to liggt dat Huvenhoopsmoor mit’n Huvenhoopssee. De Oost liggt so bi veer Kilometer in’n Noordoosten. In’n Süden flütt de Rummeldeisbeek langs, de aver na de Hamm flütt un nich na de Oost.

De Naveröörd sünd Augussendörp in’n Noorden, Granst in’n Oosten, Rhaar in’n Süüdoosten, Breddörp un Hanst in’n Süden, Noordsood in’n Süüdwesten, Korlshöben in’n Westen un Barkhusen in’n Noordwesten.

Historie ännern

In de Oorkunnen kummt de Oort toeerst 1230 as Glyndesete vör. De Oort hett to de Greven von Hoya tohöört. De Naam bedüüdt wohrschienlich soveel as Wahnseet an’n Glind (Tuun, Gelänner, Kant von wat).

De Glinster See, de in’n Noordoosten von dat Dörp legen hett, is 1823 bi de Findörpsche Moorkolonisation dröög leggt worrn.

1900 hebbt se anfungen, dat Moor wieder dröög to leggen, wat later de Oortsdeel Forstoort-Anfang warrn schull, as von 1924 af an denn bilütten Lüüd dor optagen sünd.

In’n Eersten Weltkrieg sünd 13 Soldaten ut Glinst fullen oder vermisst un in’n Tweten 52[1].

An’n 28. Juli 1943, fiev Minuten vör Klock twee in’e Nacht, is en brietschen Lancaster-Bomber, de bi de Operation Gomorrha Bummen op Hamborg smeten hett, von Nachtjägers afschaten worrn un bi Glinst bi’t Seeholt dalkamen. De dree Krulüüd weren all dood un sünd op’n Karkhoff in Glinst begraven worrn. Na’n Krieg hebbt se de Soldaten denn na England bröcht.

Bi en annern Luftkampf över Glinst is 1944 en Flegertank dalkamen un blangen de School fullen. Dat Kerosin hett denn dat Brennen anfungen un de School is afbrennt. Kort vör dat Enn von’n Krieg sünd an’n 1. Mai 1945 brietsche Truppen bet na Glinst kamen. Twee düütsche Panzers hebbt sik dor in’t Dörp verschanzt un op de Briten schaten. De Briten hebbt denn dree Daag lang bet to’n 3. Mai Granaten op dat Dörp smeten. De Inwahners weren to’n groten Deel al vörher ut Glinst weg. Liekers hett dat noch twee Dode un twee Verletzte geven. De Hüüs hebbt meist all Schadens afkregen.

Verwaltungsgeschicht ännern

In de Franzosentied von 1810 bet 1814 hett de Oort to de Mairie Karktimk in’n Kanton Otterbarg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

Glinst weer bet in dat 19. Johrhunnert opdeelt twüschen dat Amt Otterbarg un dat Gericht Hanst. In dat Johr 1791 hebbt 14 Hüüs to dat Amt Otterbarg höört un 9 to dat Gericht Hanst. As dat Gericht Hanst 1823 oplööst worrn is, is de Oort kumplett Deel von dat Amt Otterbarg worrn. To’n 1. August 1832 is dat Dörp denn aver in dat Amt Zeven wesselt un hett dor denn to de Böörd Rhaar tohöört.[2] Na 1885 weer dat in’n Kreis Zeven. 1932 is dat Deel von’n Kreis Bremervöör worrn un 1977 von’n Landkreis Rodenborg.

An’n 8. April 1974 is Glinst bi de Gemeenreform in Neddersassen mit de Gemeen Gnarrenborg tohoopleggt worrn.

Inwahnertall ännern

Johr Inwahners
1777-00-001777[3] 19 Füürsteden
1791-00-001791[4] 23 Füürsteden
1812-00-001812[5] 203
1824-00-001824[6] 37 Füürsteden
1848-00-001848[7] 236 Lüüd, 41 Hüüs
1871-12-011. Dezember 1871[8] 239 Lüüd, 43 Hüüs
1885-12-011. Dezember 1885[9] 238 Lüüd, 43 Hüüs
1905-12-011. Dezember 1905[10] 244 Lüüd, 45 Hüüs
1910-12-011. Dezember 1910[11] 268
1925-00-001925[12] 442
1933-00-001933[12] 391
1939-00-001939[12] 603
1946-00-001946[3] 835 (376 Flüchtlinge)
1950-00-001950[3] 791
1961-00-001961[3] 727
1971-00-001971[3] 649
1978-00-001978[3] 596
1984-00-001984[3] 603
2001-00-002001[3] 622
2005-12-3131. Dezember 2005 598
2008-12-3131. Dezember 2008 602

Religion ännern

Glinst is evangeelsch-luthersch präägt un höört to dat Kaspel Rhaar.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

De Karkhoff von Glinst liggt an de Karkhoffstraat.

Oortsvörstänn ännern

  • 1981-14. November 2001: Helmut Gieschen
  • 14. November 2001-: Detlef Cordes

Wapen ännern

Dat Wapen von Glinst wiest op grönen Grund över en sülvern Schildfoot en sülvern Buurnkrieger mit gollen Schoh, de oprecht steiht, an’n linken Arm en sülvern Rundschild driggt un mit de rechte Hand en gollen Lanz höllt.

Kultur ännern

In Glinst steiht en Denkmaal för de Fullenen ut de twee Weltkrieg’.

Verenen ännern

De Füürwehr von Glinst is 1901 as Plichtfüürwehr grünnt worrn un is 1936 to en Freewillige Füürwehr ümwannelt worrn. De Schützenvereen Glinst hett sik 1920 grünnt.

Weertschop un Infrastruktur ännern

An dat Stroomnett is Glinst to Silvester 1919 anslaten worrn.

Verkehr ännern

Glinst liggt an de Landsstraat 122, de in’n Noordwesten na Korlshöben un Gnarrenborg löppt un in’n Süüdoosten na Rhaar un Zeven. In’n Noordoosten geiht de Kreisstraat 148 na Sandbossel. En lüttjere Straat löppt ans noch in’n Süden na Hanst un Breddörp.

Scholen ännern

1806 is en Schoolhuus boot worrn, dat denn bet 1903 stahn hett, as dat ne’e Schoolhuus trech worrn is. Disse School is denn 1944 afbrennt un eerst 1947 wedder nee boot worrn. De School hebbt se 1974 denn kumplett dicktmaakt. Glinst hett vondaag blot noch en Kita.

Na Grundschool gaht de Kinner nu na Korlshöben un ans na Gnarrenborg.

Literatur ännern

  • Ernst Bayer: Glinste gestern - Glinstedt heute. 2008

Footnoten ännern

  1. http://www.denkmalprojekt.org/2009/gnarrenburg-glinstedt_wk1u2_ns.htm
  2. Christian Hermann Ebhardt: Gesetze, Verordnungen und Ausschreiben für das Königreich Hannover aus dem Zeitraume 1813 bis 1839. Jänecke, Hannover 1839, Band 2, Sied 65
  3. a b c d e f g h http://www.glinstedt.de/espresso/pagina.php?id=14
  4. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 83
  5. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 97
  6. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 212
  7. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 140
  8. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 170
  9. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 183
  10. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 194
  11. Inwahnertallen op gemeindeverzeichnis.de
  12. a b c Inwahnertallen op verwaltungsgeschichte.de

Weblenken ännern

  Glinst. Mehr Biller, Videos oder Audiodateien to’t Thema gifft dat bi Wikimedia Commons.