Mairie Beverst
De Mairie Beverst weer in de Franzosentied (1810 bet 1813) een von de fiev Mairien, in de de Kanton Beverst indeelt weer. De Seet weer in Beverst. Se harr 1764 Inwahners.[1]
Historie ännern
De Ümgegend von Beverst hett vör de Franzosentied to dat Gericht Beverst un de Vaagdie Gnarrenborg von dat Amt Bremervöör in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Beverst een von de negen Mairien in’n Kanton Beverst von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Beverst weer nu een von de fiev Mairien in’n Kanton Beverst, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de söss Mairien Beverst, Karkwist, Wellen, Heerst, Frellsdorp un Bokel (all söss in’n Kanton Beverst) höört harrn. Von de Mairie Karkwist is aver blots en Deel an de Mairie Beverst wesselt. De annere Deel is an de Mairie Kuhs fullen. Von de Mairie Wellen is allens utbenahmen de Oort Helljes an de Mairie Beverst gahn. Helljes is in de Mairie Kuhs wesselt. Von de Mairie Frellsdorp is blots de Oort Wolljes an de Mairie Beverst gahn un de Rest an de Mairie Ringst un von de Mairie Bokel blots de Oort Huh un de Rest an de Mairie Dammhagen.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd ännern
Dor hebbt düsse Öörd tohöört:
- Königriek Westfalen:[2]
- Kaiserriek Frankriek:[1]
- Beverst (206 Inwahners), Meyerhoff (18), Oosterndörp (75), Wehldörp (91), Beverstermöhlen (37), Wachholt (31), Taben (19), Stemmermöhlen (40), Appeln (108), Abelhorst (5), Ollendörp (69), Wellen (130), Adelst (21), Bruunshusen (55), Deelbrügg (13), Loh (46), Heerst (132), Heyerhöben (121), Westerbeverst (134), Freeschluunbarg (177), Wolljes (180), Huh (27), Dohren (23), Mals (6)
Vondaag sünd düsse Öörd Deel von de Gemeen Beverst un de Samtgemeen Hambargen.
Footnoten ännern
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 103
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 17