Carme (Maand)

Carme (ok Jupiter XI) is en vun de lütteren Maanden wieter buten vun den Planeten Jupiter.

De Maand is an’n 30. Juli 1938 vun den US-amerikaanschen Astronom Seth Barnes Nicholson an de Mount Wilson Steernwacht opdeckt worrn. Nicholson harr den Jupiter över en Tietruum vun Anfang Juli bit Enn August fotografeert un dissen Maand op en Fotoplatt funnen, de an’n 30. Juli belicht worrn is. Eerst veel later in’t Johr 1975 hett he den Naam Karme kregen, vun de Leefste vun Zeus ut de greekschen Mythologie.

Ümloopbahn

Carme löpt in en middleren Afstand vun 23.404.000 km üm Jupiter un bruukt dorför 734 Daag, 4 Stünnen un 48 Minuuten. Mit en Exzentrizität von 0,2533 wiekt de Bahn teemlich dull vun de Kreis form af. De Bahn is butendem üm 164,907° gegen de Jupiter-Bahn neegt. Dat heet, Carme löpt retrograd, also gegen den Dreihsinn vun’n Jupiter, üm den Planeten rüm.

Disse Bahnegenschoppen wiest dorop hen, dat de Maand nich hier entstahn is, man wohrschienlich vun den Planeten infungen worrn is. Woans dat nipp un nau vör sik gahnis, is aver nich bekannt. Carme is de gröttste vun en Koppel vun söventeihn Maanden to de Carme-Grupp tosamenfaat warrt. Vun disse Koppel hebbt all ungefäähr lieke Bahnen.

Physikalsch Egenschoppen

De Dörmeter vun Carme liggt bi ruchweg 46 km, wat man düchtig lütt is. Man nimmt an, dat de Maand vör allen ut Silikat-Steen besteiht, sien Dicht warrt op 2,6 g/cm³ schätzt. Carme is en düsteren Maand un hett en maximol schienbor Helligkeit vun jüst mol 17,6^m. De Bavenflach reflekteert blots 4 % vun dat infallend Sünnenlicht torüch un hett dorüm en Albedo vun 0,04.

Weblenken

Seth B. Nicholson, "Two new satellites of Jupiter", PASP 50 (1938) 292–293 (engelsch)

Maanden vun den Planeten Jupiter

Ahn Naam: S/2003 J 2 | S/2003 J 4 | S/2003 J 9 | S/2003 J 10 | S/2003 J 12 | S/2003 J 16 | S/2003 J 18 | S/2003 J 19 | S/2003 J 23 | S/2010 J 1 | S/2010 J 2 | S/2011 J 1 | S/2011 J 2 | S/2016 J 1 | S/2017 J 1 | S/2017 J 2 | S/2017 J 3 | S/2017 J 5 | S/2017 J 6 | S/2017 J 7 | S/2017 J 8 | S/2017 J 9

Kiek ok na bi: List von de Jupiter-Maanden