Erinome (ok Jupiter XXV) is en vun de lütten Maanden wieter buten vun den Planeten Jupiter.

De Maand is an’n 23. November 2000 vun de Astronomen S. Sheppard, D. Jewitt, Y. Fernández un E. Magnier vun de Universität Hawaii opdeckt worrn. Toeerst weer he as S/2000 J 4 betekent, later denn hett he den Naam vun Erinome kregen, de Dochter vun Celes ut de greekschen Mythologie, de to Leev mit Zeus dwungen weer.

Ümloopbahn ännern

Erinome hett en middleren Afstand vun 23.196.000 km vun’n Jupiter un bruukt för en Ümloop 728 Daag, 12 Stünnen un 14 Minuuten. Mit en Exzentrizität von 0,2665 wiekt de Bahn düchtig vun en Kreis af. De Bahn is butendem üm 164,934° gegen de Jupiter-Bahn neegt. Dat heet, Erinome löpt retrograd, also gegen den Dreihsinn vun’n Jupiter, üm den Planeten rüm.

Von wegen disse Bahnegenschoppen warrt Erinome to de Carme-Grupp tellt, de na denn gröttsten Jupiter-Maand ut disse Grupp, Carme, nöömt is. De hebbt all ungefäähr lieke Bahnen.

Physikalsch Egenschoppen ännern

De Dörmeter vun Carme liggt bi ruuchweg 3 km, wat man düchtig lütt is. Man nimmt an, dat de Maand vör allen ut Silikat-Steen besteiht, sien Dicht warrt op 2,6 g/cm³ schätzt. Erinome is en düsteren Maand un hett en schienbor Helligkeit vun jüst mol 22,8m. De Bavenflach reflekteert blots 4 % vun dat infallend Sünnenlicht torüch un hett dorüm en Albedo vun 0,04.