Belize (Distrikt)

De Distrikt Belize (engelsch Belize District) is een von de söss Distrikte von Belize. De Hööftoord is Belize. De Distrikt hett en Grött von 4307 km² un hett 96.600 Inwahners (Stand 2008).

Koort von’n Distrikt Belize

Koort von 1910 mit de olen Distrikt-Grenzen

Geografie

Belize liggt in’n Oosten von Belize un grenzt in’n Noorden an den Distrikt Corozal, in’n Süden an Stann Creek, in’n Süüdwesten an Cayo un in’n Noordwesten an Orange Walk. In’n Oosten liggt de Karibische See.

Grenzen

De Grenz na’n Distrikt Corozal in’n Noorden fangt an de Küst bi Bennetts Lagoon twüschen Bomba un Neuland an un löppt von dor stuur na Westen bet an en Punkt in’n Süden von Neuland. Dor drippt de Distrikt Belize op’n Distrikt Orange Walk.

De Grenz geiht von dor na Süüdwesten bet an dat Noordenn von de Laguun von Crooked Tree un denn de Laguun dal na Süden bet na de Spanish Creek Lagoon un en lütt Stück den Spanish Creek hoog. Dor knickt de Grenz na Süüdwesten af bet na de Crabcatcher Lagoon un denn na Süden bet an de Steed, an de de Labouring Creek in’n Belize River münnt. De Belize River billt hier nu för en poor Kilometer bet St. Paul’s Bank de Grenz to’n Distrikt Cayo. Dor knickt de Grenz af un löppt stuur na Süden bet na’n Nancy Porter Creek un den Sibun River.

Hier is de Stroomloop von Sibun River un Indian Creek de Grenz na’n Distrikt Cayo. In de Neegd von Santa Martha drippt de Indian Creek op’n Distrikt Stann Creek. Von dor löppt de Grenz üm un bi 25 Kilometer stuur na Oosten bet an an en Siedenarm von’n Mullins River, de för üm un bi twee Kilometer de Grenz billt. Dor wennt de Grenz sik en Stück na Noordoosten bet an’n Mangrove Creek. De Mangrove Creek is för en beten mehr as twee Kilometer bet an sien Münn in’n Golf von Honduras de Grenz twüschen de Distrikte Belize un Stann Creek.

Tosätzlich höört en groten Deel von de Eilannen vör de Küst to’n Distrikt Belize. De Grenz twüschen Caye Caulker un Mexiko löppt an’n Boca Bacalar Chico langs.

Inwahnertall

Johr	Inwahners
Zensus 1921	17.398
Zensus 1946	26.781
Zensus 1960	40.084
Zensus 1970	49.355
Zensus 1980	50.801
Zensus 1991	57.030
Zensus 2000	70.670
Zensus 2010	95.291

De Inwahners weren bi’n Zensus 2000 to 59 % Kreolen, to 25 % Mestizen, to 6 % Garifuna un to 3 % Inders. De Rest hett sik op de verscheden annern Volksgruppen von Belize opdeelt.

Ünnerafdelen

Gemenen

De Gemenen binnen Belize sünd:

Belize City Bermudian Landing Biscayne Boston Burrell Boom Caye Caulker Crooked Tree Double Head Cabbage Flowers Bank Gales Point

Gardenia Gracie Rock Hattieville Isabella Bank La Democracia Ladyville Lemonal Lords Bank Lucky Strike Mahogany Heights

Maskall Rancho Dolores Rock Stone Pond San Pedro Town Sand Hill Santana Scotland Halfmoon St. George’s Caye St. Paul’s Bank Willows Bank

Wahlen

Binnen den Distrikt gifft dat dörteihn Wahlkreise: Albert, Belize-Land Zentraal, Belize-Land Noord, Belize-Land Süüd, Karibische Küst, Collet, Fort George, Freetown, Lake Independence, Mesopotamia, Pickstock, Port Loyola un Queen’s Square.

Weblenken

Belize. Mehr Biller, Videos oder Audiodateien to’t Thema gifft dat bi Wikimedia Commons.

• Websteed von den Distrikt (engelsch)

Distrikte von Belize

Belize | Cayo | Corozal | Orange Walk | Stann Creek | Toledo