Godenst

Wapen/Flagg	Koort
Basisdaten
Bundsland: Neddersassen Landkreis: Rodenborg Samtgemeen: Sürsen Gemeen: Seedörp
Inwahners:
Postleettall:	27404
Vörwahl:	04281
Geograafsche Laag:	53° 20′ N, 9° 13′ O

Godenst (hoochdüütsch Godenstedt) is en Dörp in de Gemeen Seedörp (Samtgemeen Sürsen) in’n Landkreis Rodenborg, Neddersassen.

Geografie

Godenst liggt an dat linke Över von de Oost. En Stück in’n Süüdoosten münnt ok de Baad in de Oost. In’n Westen liggt de Born von’n Rummeldeisbeek, de in de Hamm münnt. Dor liggt also de Waterscheed twüschen Elv un Werser.

De Naveröörd sünd Sürsen un Seedörp in’n Noorden, Twistenbossel, Tzassenholt un Meinst in’n Noordoosten, Brauel, Offens un Zeven in’n Süüdosten, Baadmöhlen in’n Süden, Oostereis in’n Süüdwesten un Rockst, Eitzt, Eitzmöhlen un Lahmst in’n Noordwesten.

Historie

In Godenst hett dat Mergelkuhlen geven, in de en ganz Reeg Funnen von Mammutknaken maakt worrn sünd. De Mergel hett sik ut Söötwaterkalk ut de Twüscheniestieden billt. De Funnen hebbt dor ok to föhrt, dat dat Wapen von de fröhere Gemeen Godendörp un de hüdige Gemeen Seedörp en Mammut wiest. De Mergel is afboot worrn, üm de Äcker to düngen.

In’n Eersten Weltkrieg sünd söss Soldaten ut Godenst fullen oder vermisst.

Bi’n Weddstried Uns Dörp schall schöner warrn is Godenst 1970 Bezirkswinner, Landswinner un ok Bundswinner worrn.

Verwaltungsgeschicht

In de Franzosentied von 1810 bet 1814 hett de Oort to de Mairie Sürsen in’n Kanton Zeven höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Böörd Sürsen in dat Amt Zeven tohöört. Na 1885 weer dat in’n Kreis Zeven un na 1932 in’n Kreis Bremervöör. 1977 is dat Deel von’n Landkreis Rodenborg worrn.

1859 schull de Oort mit de ganze Böörd Sürsen in dat Amt Bremervöör wesseln, aver Godenst is dör en Verordnung von’n 22. Juni 1859 doch wedder in dat Amt Zeven trüggwesselt.

De Oort is an’n 1. März 1974 mit de Gemeenreform in Neddersassen Deel von de Gemeen Seedörp worrn. De Gemeen Godenst weer von 1965 bet 1974 Deel von de Samtgemeen Sürsen. De is 1974 oplööst worrn un dor is de ne’e un gröttere Samtgemeen Sürsen billt worrn, to de de Gemeen Seedörp sietdem tohöört.

Inwahnertall

Johr	Inwahners
1793-00-001793	7 Füürsteden
1824-00-001824	8 Füürsteden
1848-00-001848	87 Lüüd, 15 Hüüs
1871-12-011. Dezember 1871	89 Lüüd, 16 Hüüs
1910-12-011. Dezember 1910	112
1925-00-001925	162
1933-00-001933	142
1939-00-001939	137

Religion

Godenst is evangeelsch-luthersch präägt un höört to dat Kaspel von de St.-Lamberti-Kark in Sürsen.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Wapen

Dat Wapen hett en root Feld un dorop en Mammut, dat na rechts geiht. De Stööttähn un Footnagels sünd in Gold afsett. De Schildfoot is swart un wiest en Escher in Sülver, de na rechts utricht liggt.

Kultur

En Denkmaal för de Fullenen ut de twee Weltkrieg’ steiht in Sürsen an de Kark.

Weertschop un Infrastruktur

Godenst hett en egene freewillige Füürwehr.

Verkehr

Dör Godenst löppt de Kreisstraat 143, de in’n Noordwesten na Rockst geiht un in’n Süüdoosten na Zeven an de Bundsstraat 71. Ans gifft dat noch lüttjere Straten na Eitzt un na Seedörp an de B 71.

De nächste Autobahn is de Autobahn 1. De Opfohrt 48 Elsdörp liggt so 13 Kilometer in’n Süüdoosten von Godenst.

De nächste Bahnhoff is so bi 19 Kilometer wied weg in’n Noorden de Bahnhoff Heesdörp an de Bahnlien Bremerhoben–Buxthu. Fröher harr Godenst ok en egen Bahnhoff an de Bahnlien Bremervöör–Wasra. Dor hett dat von 1890 bet 1968 Personenverkehr geven.