Oostereis

Oostereis (hoochdüütsch Ostereistedt) is en Oort un Gemeen in de Samtgemeen Sürsen in’n Landkreis Rodenborg (Wümm) mit 965 Inwahners (Stand 31. Dezember 2022). To de Gemeen höört ok de Oortsdeel Rocks.

Wapen/Flagg

Koort

Basisdaten

Bundsland: Neddersassen

Landkreis: Rodenborg (Wümm)

Samtgemeen: Sürsen

Flach:

28,5 km²

Inwahners:

965 (31. Dezember 2022)

29 m över de See

27404

04285

Koordinaten:53° 18′ N, 9° 10′ O53° 18′ N, 9° 10′ O

Grenzen bi OSM:

1023214

Gemeenslötel:

03 3 57 036

Öörd in de Gemeen:

2

Börgermeester:

Ulrike Ringen (WG-O)

Websteed:

www.selsingen.de/ostereistedt.php

Koort

Kreis

Geografie

Oostereis liggt süüdwestlich in de Samtgemeen Sürsen twüschen de Gemenen Rhaar in’n Westen un Sürsen un Seedörp in’n Oosten. In’n Noorden is en lütt Stück Grenz na de Eenheitsgemeen Gnarrenborg to, jüst as in’n Süüden na Karktimk in de Samtgemeen Tarms. En längere Grenz gifft dat in’n Süüden na de Gemeen Zeven.

De Landschap vun Oostereis is landweertschopplich prägt mit Ackerland un Wischen. De Gemeen liggt nipp un nau op de Waterscheed twüschen Werser un Elv: Wiel dat Water in’n noordwestlichen Deel över den Rummeldeisbeek in de Hamm un dormit wieter in de Werser ströömt, warrt dat in’n Süüden över de Baad un de Oost in de Elv inspiest. In dat Rebeed üm Rockst in’n Noorden flütt dat Water direkt in de Oost.

Geologie

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

Historie

Den Naam Oostereis hett Peter Frankenfeld 1967 in de Feernsehsennen „Vergißmeinnicht“ raten laten un wies as Henwiesen luter namaakte grote Oostereier. Dordör is de Oort enigermaten bekannt worrn – sogor bit na Kanada, woneem in en düütschspraakig Daagblatt doröver schreven weer – un ok vundaag noch, schrievt Kinner ut ganz Düütschland to Oostern an den Oosterhaas in Oostereis.^[1] In Wohrheit hett de Naam nix mit den Oosterbruuk to doon, man, woneem de nu herkummt, dat is nich nipp un nau wiss. Vermoodt warrt aver, dat de Naam op de Ekenbööm hendüüt, de dat dor gifft un dormit vun „Eykensteed“ afleidt is.

De Naam vun de Oortsdeel Rocks kann ok op verscheden Oort düüt warrn. Een Mööglichkeit sütt en Verbinnen vun de Naam na den Raav (vun Rook „Kolkraav“), wat op en Kolkraven- oder Wodansravendörp hendüüt. De Naam künn aver ok vun de Koornsort Roggen afkamen. De Oort is 1153 to’n eersten mol in en Oorkunn nöömt as Rocstede. De beiden Oortsdelen weern fröher egenstännige Gemenen, de 1974 in’n Rahmen vun de Rebeetsreform tosamenleggt un to de Samtgemeen Sürsen torekent worrn sünd.

De Oort weer vör 1859 in’t Amt Bremervöör, von 1859 bet 1885 in’t Amt Zeven un von 1885 bet 1932 Deel von’n Kreis Zeven.^[2] Dat is denn Deel von’n Kreis Bremervöör worrn. 1977 is Oostereis an’n Landkreis Rodenborg kamen.

Politik

Gemeenraat

De Gemeenraat vun Oostereis hett negen Liddmaten. Siet de Kommunalwahl 2011 sett de sik as folgt tosamen:

Partei	2016	2011	2006
WG-R	3	3	5
WG-O	6	6	6

Börgermeester

Börgermeesterin vun de Gemeen is Ulrike Ringen (SPD) vun de WG Oostereis, sien eerste Viez is Hermann Peper vun de WG Oostereis.

1996–2011: Rudolf Kahrs (WG Rocks)
2011–: Ulrike Ringen (WG Oostereis)

Wapen

Dat Wapen hett en golden Grund, de vun en grönen schraaglinken Bülgenbalken deelt warrt. De Balken steiht för de Oost. In’t bövere Feld is en swarten Raav to sehn, de för den Oortsdeel Rocks steiht. In dat ünnere Feld is en Kranz vun Ekenloov to sehn, de as Teken för den Oortsdeel Oostereis steiht.

Kultur

In de Gemeen Oostereis steiht dat öllste bekannte Buernhuus vun’n Landkreis Rodenborg (Wümm). Dat Eckes Huus is 1564 boot worrn un is dat enzige noch bewahrte Rookhuus in’n Landkreis. Delen vun’t Dack weern al mol instört un dat Huus stünn kort vör’t Afrieten, is aver vun de Intressengemeenschop Buernhuus (IGB) in johrlange opwännige Arbeit neemaakt worrn – wobi mööglichst veel vun de oorsprüngliche Bosubstanz sekert weer.

Verkehr

Dör Oostereis löpt de L 122, de Gnarrenborg mit Zeven verbinnt, woneem se an de B 71 ranföhrt. Gröttere Straten gaht nich dör dat Gemeenrebeet, aver noch en poor Kreisstraten: De K 137 verbinnt Rocks mit Oostereis un geiht na Süüden wieter na Badens. Vun Rocks gifft en mit de K 143 en direkt Verbinnen na Zeven un de K 119 löpt vun Rhaar över Rocks wieter na Sürsen.

Borns

↑ http://www.selsingen.de/dorfgeschichte.php
↑ Sammlung der Gesetze, Verordnungen und Ausschreiben für das Königreich Hannover: vom Jahre 1859. Kius, 1859, Sied 693

Städer un Gemenen in den Landkreis Rodenborg (Wümm)

[1] ttp://www.selsingen.de/dorfgeschichte.php

[2] Sammlung der Gesetze, Verordnungen und Ausschreiben für das Königreich Hannover: vom Jahre 1859. Kius, 1859, Sied 693

[1]

[2]