Lauenbrüch

Lauenbrüch (hoochdüütsch Lauenbrück) is en Oort un Gemeen in de Samtgemeen Fintel in’n Landkreis Rodenborg (Wümm) mit 2615 Inwahners (Stand 31. Dezember 2023). In Lauenbrüch is ok de Sitt vun de Verwalten vun de Samtgemeen Fintel.

Wapen/Flagg

Koort

Basisdaten

Bundsland: Neddersassen

Landkreis: Rodenborg (Wümm)

Samtgemeen: Fintel

Flach:

21,89 km²

Inwahners:

2615 (31. Dezember 2023)

31 m över de See

27389

04267

Koordinaten:53° 12′ N, 9° 34′ O53° 12′ N, 9° 34′ O

Grenzen bi OSM:

357090

Gemeenslötel:

03 3 57 033

Öörd in de Gemeen:

1

Börgermeester:

Jochen Intelmann (SPD)

Websteed:

www.fintel.de

Koort

Kreis

Geografie

Lauenbrüch liggt in de Mitt vun de Samtgemeen mit de Gemenen Helsch un Stemmen na Noorden to un Vahl in’n Süüdoosten. In’n Süüden un Süüdwesten slutt sik de Eenheitsgemeen Scheeßl an un na Noordoosten hen besteiht Kuntakt to’n Landkreis Horborg.

De Gemeen un jüst so ok de Oort Lauenbrüch is ümgeven vun Woold- un Moorrebeden, Seen, Auen un Heidflachen. Dat is also ’n ruhige Laag, man dicht bi de Verkehrsweeg na Hamborg oder Bremen, de dormit licht antoföhren sünd.

Geologie

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

Historie

Dat eerste mol weer Lauenbrüch in en Oorkunn nöömt in’t Johr 1358. De Naam kummt kummt vun en olle Schrievwies vun Sieten vun de Hertöög vun Bronswiek un Lünborg, de siet dat fröhe Middelöller den Lööv in jemehr Wapen föhrt. De achtere Naamsdeel düüt op en Brüch: In dat Rebeet verlööp fröher en Heerweg, de an disse Steed över de beiden Strööm Wümm un Fintau föhrt hett. Dorüm is de Oord hier tostannen kamen. De Brüch weer vermodtlich en Pahlbrüch, de 40 bit 80 Meter lang wesen hebben schall. Henwiesen, dat dat de Brüch tatsächlich geven hett, sünd bi’n Neeboo vun de Sahlglied opfunnen worrn, as dorbi ruchweg 600 Johr olle Ekenpöhl utgraavt weern.

Verwaltungsgeschicht

Lauenbrüch hett vör 1825 to dat Gericht Lauenbrüch höört un is denn Deel von de Vaagdie Töst in dat Amt Horborg ween. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Dit Amt hett bet 1885 bestahn, as dat Dörp Deel von’n Kreis Horborg worrn is. 1932 is de Oort, de sounso blots över en lütten Stremel Land mit’n Rest von Kreis Horborg verbunnen weer, von’n Kreis Horborg trennt worrn un is denn Deel von’n Landkreis Rodenborg ween.

Religion

Lauenbrüch is evangeelsch-luthersch präägt un billt mit de Martin-Luther-Kark en egen Kaspel. De Kark is 1957 boot un 1970 egenstännig worrn. Vörher hett de Oort to dat Kaspel von de Lucas-Kark in Scheeßl tohöört.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Politik

Gemeenraat

Siet de Kommunalwahl 2016 sett sik de Gemeenraat as folgt tosamen:

Partei	2016	2011	2006
CDU	4	–	5
SPD	7	8	7
BfL	–	4	—
Gröne	2	1	1

Börgermeester

Börgermeester vun de Gemeen is siet 2002 de SPD-Politiker Jochen Intelmann, Sien eerste Viez is Barbara Graafsche vun Bothmer vun de CDU, de tweete Viez is Heinz Promann (SPD).

Wapen

Dat Wapen wiest op de verleden Tiet hen: en blauen Lööv op goldenen Grund, de över en Knüppeldamm över en blau Waterflach schreedt.

Kultur

De Gemeen is ländlich prägt, dör de Verkehrsanbinnen aver goot mit de groten Städer anbunnen un wiest allgemeen in hoge Levensqualität op. De Gegend is fein för’t Wannern un Utfohrten maken un hett op dat „Löweneiland“ ok en Campingsteed to antobeden op – nipp un nau dor, woneem de Fintau un de Wümm tohopenlopen doot. Jüst dor kann’n ok mit Kanus Waterwannern maken. Nich wiet weg is ok de Lauenbrücher Wildpark, woneem man to’n Bispeel op’n Esel oder op’n Pony rieden kann.

In de Gemeen besteiht en riek Anbott för Sport. För Kinner gifft dat enige Speel- un Bolzplätz. In de Turnhall vun de Grundschool Kann een Gymnastik un Turnen maken. För Footballintresserte steiht en Platz mit Flootlichtanlaag praat un neven twee Sportverenen gifft dat ok noch en Bundskegelbahn un’n Angelvereen.

Weertschop un Infrasturktur

Lauenbrüch gellt na dat Regionale Ruumordnungsprogramm as Grundzentrum för de Öörd in de Ümgegend.

Verkehr

Dör Lauenbrüch föhrt de K 212 de över Fintel wieter na Snevern löppt. Op de annern Siet münnt de Kreisstraat gor nich wiet weg in de B 75 vun Hamborg na Bremen. De neegste Autobahnansluss is de Opfohrt 47 Zittens op de A 1 (Afsnidd Hamborg–Bremen).

Lauenbrüch liggt togliek ok an de Bahnlien twüschen Hamborg un Bremen. Opstunns hollt dor blots af un an mol en Regionaltog, man dat gifft en Plaan, nadem Lauenbrüch in’t Johr 2010 Systemhalt vun de Metropolenbahn warrn schall.

Scholen

Lauenbrüch hett en Grundschool. Siet 2000 gifft dat hier butendem de nee’boot Fintauschool, wat en Hööft- un Realschool is.

Literatur

Claus Stamann: Das Schlosslehen Lauenbrück, die Herren von Bothmer, die Bauern und das Dorf. Wasra 2012

Städer un Gemenen in den Landkreis Rodenborg (Wümm)