Noordholt
| Wapen/Flagg | Koort | |
|---|---|---|
|
|
| |
| Basisdaten | ||
| Inwahners: | ||
| Postleettall: | 27637 | |
| Vörwahl: | 04741 | |
| Geograafsche Laag: | Koordinaten:53° 47′ N, 8° 37′ O53° 47′ N, 8° 37′ O | |
|
| ||
Noordholt (hoochdüütsch Nordholz) is en Dörp in de Gemeen Wuster Noordseeküst in’n Landkreis Cuxhoben, Neddersassen. Binnen de Gemeen höört de Oort to de Oortschop Noordholt.
Geografie
ännernNoordholt liggt op de Westsied von de Geest von de Hoge Lieth. Na Westen to liggt de Masch von Land Wusten. An’n Noordrand flütt dat Water af över den Oxter Beek, in’n Süüdwesten över den Kiebitzhörner Beek na’n Wallsgroov.
An’n Westrand von Noordholt doot de Naturschuulrebeden Steekginsterheid in Noordholt un Klinten liggen.
De Naveröörd sünd Ox in’n Noorden, Franzenborg un Godendörp in’n Noordoosten, Köstersweg in’n Oosten, Wanhöden in’n Süüdoosten, Knill, Dieksenn un Millm in’n Süden, Spiek un Spieker Olendiek in’n Süüdwesten un Spieker Neefeld in’n Noordwesten.
Historie
ännern
Noordholt kummt in dat 14. Johrhunnert as Norderortt toeerst in de Oorkunnen vör. Dat ole Dörp bestünn blots ut een Straat, an de de Hüüs opreegt weren. Dat weer de hüdige Möhlenstraat. Dat is so noch bet in dat 20. Johrhunnert bleven.
Eerst as Noordholt en Bahnhoff an de Bahnlien Bremerhoben–Cuxhoben kregen hett (de över twee Kilometer in’n Oosten von dat ole Dörp liggt) un dor 1912 en groten Luftschipp-Haven anleggt worrn is, is Noordholt denn anfungen to wassen. De Luftschipp-Haben is 1921 demonteert worrn, von 1935 bet 1945 hett dat den Flegerplatz Noordholt von dat düütsche Militär geven, de denn ok noch bet 1946 von de Amerikaners bruukt worrn is. 1958 hett de Bundswehr den Flegerplatz övernahmen.
Dör de Lüüd, de mit dat Militär na Noordholt kamen sünd, is de Oort stark wussen. De Wahnrebeden üm den Bahnhoff rüm sünd vondaag düüdlich grötter as dat ole Dörp an de Möhlenstraat. Supermärkt un Ladens doot vondaag to’n groten Deel in de Neegd von’n Bahnhoff liggen.
En Buckmöhl in Noordholt an’t Süüdenn von de Möhlenstraat keem 1766 toeerst in de Oorkunnen vör. De Buckmöhl is afreten worrn, nadem 1863 en ne’en Galeriehollanner-Windmöhl boot worrn is. De Möhl is 1875 dör en Blitzslagg afbrennt, denn aver wedder opboot worrn. Disse Möhl steiht ok vondaag noch.
1816 is in Noordholt bi’n Gasthoff Zum grünen Walde en Deckstatschoon von dat Landgestüt Celle inricht worrn. 1872 is de Statschoon na’n Gasthoff Stadt Frankfurt ümtagen. De Statschoon hett denn noch bet 1957 bestahn. Na disse Tied weer se in Cappel-Streek.
1905 is dat Hartsteenwark Oest & Co., later Meinke & Co., anleggt worrn. Dat Wark hett ut Sand un Kalk Kalksandsteen herstellt un weer bet to’n 31. Dezember 1984 in Bedriev.
In’n Eersten Weltkrieg sünd 20 Soldaten ut Noordholt fullen oder vermisst.[1]
Goodshuus
ännernDat Goodshuus von dat Good Noordholt is 1690 boot worrn. Jobst Heinrich Voigt hett 1708 dat Good Noordholt köfft. Voigt sien Arven hebbt den Besitt in Wusten 1736 an de Kamer verköfft, de dor dat Amt Noordholt ut billt hett. Dat Goodshuus is denn as Amtshuus bruukt worrn.
Dat Huus hett bet 1928 stahn, as dat in Besitt von de Familie Lankenau weer, de dat för en Neebo afreten hett.
Verwaltungsgeschicht
ännernIn de Franzosentied von 1810 bet 1814 hett de Oort to de Mairie Spiek in’n Kanton Dorum höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett von 1739 bet to’n 5. Juni 1819 to dat Amt Noordholt tohöört un denn bet 1852 to dat Vaagdiegericht Land Wusten. Von 1852 bet 1885 weer dat in dat Amt Dorum un denn in’n Kreis Leh. 1932 is dat Deel von’n Kreis Wersermünn worrn un 1977 von’n Landkreis Cuxhoben.
1924 müss Noordholt Land afgeven, as Wusterheid ut Rebeed von verscheden Gemenen nee grünnt worrn is. An’n 1. Juli 1967 is de Oort denn aver mit Dieksenn un Wusterheid to de ne’e, gröttere Gemeen Noordholt tohoopslaten worrn, de 1970 denn noch Wanhöden un 1974 Spiek opnahmen hett. To’n 1. Januar 2015 is de Gemeen Noordholt oplööst un dor is tohoop mit de Samtgemeen Land Wusten de ne’e Gemeen Wuster Noordseeküst von worrn. Dat Rebeed von de vörherige Gemeen Noordholt billt nu en polietsche Oortschop binnen de Gemeen Wuster Noordseeküst un hett en egen Oortsraad un Oortsbörgermeester.
Inwahnertall
ännern| Johr | Inwahners |
|---|---|
| 1793[2] | 27 Füürsteden |
| 1812[3] | 136 |
| 1824[4] | 31 Füürsteden |
| 1848[5] | 213 Lüüd, 44 Hüüs |
| 1. Dezember 1871[6] | 227 Lüüd, 46 Hüüs |
| 1. Dezember 1910[7] | 249 |
| 1925[8] | 344 |
| 1933[8] | 462 |
| 1939[8] | 527 |
Religion
ännernNoordholt is evangeelsch-luthersch präägt un billt siet den 1. Januar 1968 mit de Kark to’n goden Heer en egen Kaspel. Vörher hett de Oort to de Georg-Kark in Spiek höört.
För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.
Wapen
ännernDat Wapen von Noordholt wiest vörn op sülvern Grund halv en rood Peerd un achtern op roden Grund en sülvern Fuhr.
Kultur
ännernEn Denkmaal för de Fullenen ut de twee Weltkrieg’ steiht in de Möhlenstraat.
Verenen
ännernDe Schüttenvereen Noordholt un Ümgegend is 1852 grünnt worrn.
Weertschop un Infrastruktur
ännernNoordholt gellt na dat Regionale Ruumordnungsprogramm as Grundzentrum för de Öörd in de Ümgegend.
Noordholt hett en egene freewillige Füürwehr, de 1904 grünnt worrn is.
Elektrischen Stroom hett de Oort von 1921 af an över dat Överlandwark Noord-Hannover kregen.
Noordholt hett Filialen von de Werser-Elv-Spoorkass un von de Volksbank Bremerhoben-Cuxland.
Verkehr
ännernIn’n Oosten von Noordholt löppt de Landsstraat 135 langs, de in’n Noorden na Olenwoold un Cuxhoben geiht un in’n Süden över Millm, Holsseln, Sievern un Langen na Bremerhoben. In’n Noorden geiht de Kreisstraat 7 över Ox un Berensch na Spangen un in’n Süüdwesten de K 68 över Olendiek hen na Cappel un Padingbüddel. De 74 föhrt in’n Süden na de K 14 un na Knill un Spiek.
De nächste Autobahn is de Autobahn 27 (Afsnidd Bremerhoben–Cuxhoben). De Opfohrt 3 Noordholt liggt so söss Kilometer in’n Süüdoosten von Noordholt an de K 14.
De Bahnhoff Noordholt liggt an de Bahnlien Bremerhoben–Cuxhoben.
Scholen
ännernNa 1821 hett de Oort en Schoolverband mit Dieksenn billt. Nadem de School 1889 afbrennt is, is en ne’e School an’t Süüdenn von de Möhlenstraat boot worrn. Disse School bestünn bet 1968. Nu gaht de Kinner na de Grundschool Noordholt an’n Noordweg. De ölleren Kinner köönt na de Oberschool Dorum gahn oder op dat Amandus-Abendroth-Gymnasium Cuxhoben, dat Lichtenberg-Gymnasium Cuxhoben oder dat Gymnasium Wersermünn in Bremerhoben.
Lüüd
ännernDe Maler Richard Curdes hett von 1924 bet to sien Dood 1974 in Noordholt leevt.
Footnoten
ännern- ↑ http://www.denkmalprojekt.org/dkm_deutschland/nordholz_wk1_ns.htm
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 169
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 446
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 147
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 154
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Cappel | Dorum | Millm | Misselwarden | Mulsen | Noordholt | Padingbüddel | Wremen