Harndorp
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 10,93 km² | |
| Inwahners: | 459 (18. August 2014) | |
| Inwahnerdicht: | 42 Inwahners pro km² | |
| Hööchd: | 12 m över NHN | |
| Postleettall: | 27628 | |
| Vörwahl: | 04746 | |
| Geograafsche Laag: | Koordinaten:53° 21′ N, 8° 44′ O53° 21′ N, 8° 44′ O | |
|
| ||
Harndorp (hoochdüütsch Harrendorf) is en Dörp in de Gemeen Hagen in’n Landkreis Cuxhoben, Neddersassen. Dat höört binnen de Gemeen Hagen to de polietsche Oortschop Braamst.
Bi Harndorp höört von öllers ok de lüttje Oort Bremerhorn un en Deel von Finterbarg mit bi.
Geografie ännern
De Oort liggt op de Oosterholter Geest. Dat Water ut dat Rebeed flütt över de Gackau af.
De Naveröörd sünd Kraansmoor in’n Noorden, Loh in’n Noordoosten, Ax in’n Oosten, Wohlthöben, Biloh un Bremerhorn in’n Süüdoosten, Haslah un Albst in’n Süüdwesten, Finn un Finterbarg in’n Westen un Braamst un Gackau in’n Noordwesten.
Historie ännern
Harndorp kummt 1105 as Hornendorp toeerst in de Oorkunnen vör.
Verwaltungsgeschicht ännern
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Albst in’n Kanton Hagen höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Dammhagen in’n Kanton Hagen.
De Oort hett vör 1885 to de Böörd Braamst in dat Amt Hagen tohöört. Na 1885 weer dat in’n Kreis Geestmünn. 1932 is dat Deel von’n Landkreis Wersermünn worrn un 1977 von’n Landkreis Cuxhoben.
De Oort weer fröher en egen Gemeen. 1929 is dor tosätzlich noch de Gemeen Finn mit tokamen. De Gemeen Harndorp is an’n 1. März 1974 mit de Gemeenreform in Neddersassen Deel von de Gemeen Braamst (Samtgemeen Hagen) worrn. Braamst wedder is an’n 1. Januar 2014 Deel von de Gemeen Hagen worrn. Sietdem höört de Oort to de Oortschop Braamst, de en egen Oortsraad un Oortsbörgermeester hett.
Inwahnertall ännern
| Johr | Inwahners |
|---|---|
| 1791[1] | 22 Füürsteden |
| 1812[2] | 124 |
| 1824[3] | 22 Füürsteden |
| 1848[4] | 105 Lüüd, 21 Hüüs |
| 1. Dezember 1871[5] | 124 Lüüd, 21 Hüüs |
| 1. Dezember 1885[6] | 98 Lüüd, 21 Hüüs |
| 1. Dezember 1905[7] | 108 Lüüd, 19 Hüüs |
| 1. Dezember 1910[8] | 124* |
| 1925[9] | 138* |
| 1933[9] | 278** |
| 1939[9] | 264** |
- * tohoop mit Bremerhorn un en Deel von Finterbarg
- ** tohoop mit Bremerhorn, Finn un Finterbarg
Religion ännern
Harndorp is evangeelsch-luthersch präägt un höört to dat Kaspel von de Jacobi-Kark in Braamst.
För de Kathoolschen is de Johannes-de-Döper-Kark in Lox tostännig, de 1965 grünnt worrn is. Vör 1965 weer de Nikolaus-Kark in Wulsdörp tostännig. De Johannes-de-Döper-Kark höört siet 1. November 2006 to de Karkengemeen Hillig Hart Jesu in Geestmünn.
Wapen ännern
Dat Wapen von Harndorp wiest vör op grönen Grund de gollen Kopp von en Rehbuck un achtern op sülvern Grund twee gröne Dannen un dor ünner en gollen beslagen, swart Hifthoorn.
Rehbuck un Dannen wiest op dat Holt in de Ümgegend von Harndorp hen. Dat Hifthoorn steiht för’n Naam, so as he toeerst in de Oorkunnen vörkeem (Hornendorp).
Utklamüsert hett dat Wapen de Heraldiker Albert de Badrihaye.
Kultur ännern
Verenen ännern
In’n Schüttensport sünd de Lüüd ut Harndorp in’n Schüttenvereen Finn mit aktiv.
Weertschop un Infrastruktur ännern
Harndorp hett en egene freewillige Füürwehr, de 1901 grünnt worrn is.
Verkehr ännern
Dör Harndorp löppt de Kreisstraat 46, de in’n Westen över Finterbarg un Finn na de Landsstraat 135 geiht un in’n Oosten na Ax. In Harndorp geiht von de K 46 na Süüdoosten de K 47 af, de na Ohlenst löppt. De L 135 geiht in’n Noordwesten twüschen Hagen un Braamst dör, krüüzt dor de L 134, un föhrt na Bremerhoben-Wulsdörp. In’n Süüdoosten geiht de L 135 över Dörphagen, Hoop un Garlst na Bremen-Noord to.
De nächste Autobahn is de Autobahn 27 (Afsnidd Bremen–Bremerhoben). De Opfohrt 12 Hagen liggt so twölv Kilometer in’n Noordwesten von Harndorp an de K 51 un de Opfohrt 13 Uthleer twölv Kilometer in’n Süüdwesten an de K 48.
De nächste Bahnhoff is so bi fiev Kilometer wied weg in’n Oosten de Bahnhoff Lübbs an de Bahnlien Bremen–Bremerhoben.
Scholen ännern
De ole Volksschool in Harndorp hett 1972 dichtmaakt.[10] De Kinner kemen denn na Braamst un Wittst op School. Vondaag gaht de Kinner op de Grundschool Braamst. Nadem se mit de Grundschool dör sünd, gaht se in Hagen för Haupt- un Realschool op de Hermann-Allmers-School oder för dat Gymnasium op de Waldschool Hagen/Beverst.
Footnoten ännern
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 96
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 246
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 155
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 162
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 50
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
- ↑ Die Geschichte der Hermann-Allmers-Schule
Weblenken ännern
Albst (mit Büggeln) | Braamst (mit Braamst, Braamstermoor, Bremerhorn, Finn, Finterbarg, Gackau, Harndorp, Loh un Wittst) | Dörphagen | Driftseth (mit Dannendörp, Rechtenflethermoor un Wittenbarg) | Hagen (mit Börsten un Harmonie) | Hein (mit Vosloog) | Hoop (mit Seelhorn) | Kassbrook (mit Grienenbargshusen un Kassbroker Heid) | Leernst (mit Born, Düngel, Neenhusen un Seedörp) | Offenwarden (mit Offenwardermoor) | Rechtenfleth (mit Blömkenmoor, Dreptersiel un Feldhoff) | Saans (mit Saanstermoor) | Uthleer (mit Cleve un Uthleererbarg) | Weersbe (mit Weersbermoor) | Wolsbuddel (mit Heesen un Woldar) | Wortfleet (mit Rechtebe un Rechtebermoor)